Lo 10 de genièr passat, se commemorava a Tolosa lo 836n anniversari de la signatura de sa carta istorica. D’efièch, lo 6 de genièr de 1189, lo comte Ramon V autregèt los poders civils al pòble de Tolosa, après una revolucion borgesa. Lo poder lo prenguèron los capítols, los dotze oficièrs municipals de la Ciutat Mondina que bastirián lo Capitòli. La Republica de Tolosa representèt lo pòble tolosan fins a sa dissolucion pendent la Revolucion Francesa. Saludam plan aquel eveniment, del temps que saludam totas las inciativas popularas que se fan per recobrar nòstra istòria raubada. Dins sa tribuna d’opinion, Joan-Marc Leclercq nos remembrava cossí l’estat a emplegat de “mejans que son pas totjorn aunèstes, per bastir una unitat nacionala qu’existís pas”.

Fa de temps que los occitans avèm daissada en mans estrangièras la direccion de nòstre pòble. Per o nos prene en evitant que los occitans nos n’avisem, una de las prioritats politicas estrategicas de l’estat francés es estada, e es encara, la destruccion de nòstre relat pròpri de l’istòria. Nos an cambiada e capvirada nòstra istòria fins al ponch que los occitans desconeissèm quinas son nòstras originas e que la majoritat de la societat pensa, uèi, que l’istòria occitana es l’istòria francesa.

Segurament, França es un país que contraròtla a la perfeccion l’art de la manipòla istorica. Avèm ja explicat dins aqueste jornal cossí França a cambiats los noms occitans de las causas per de noms actualament fòrça enrasigats, mas qu’en realitat vòlon pas res dire e qu’an pas cap de sens. Tanben en tèrmes istorics, i a d’episòdis qu’an pas cap de logica segon lo biais que son explicats per l’educacion francesa dicha “nacionala”.

Per astre, totjorn que mai, los istorians trabalhan l’istòria del país de la lenga d’òc per que l’ajam a posita. Lo sègle XXI nos a portadas de tecnologias de la comunicacion amb una relacion orizontala que dificultan cada còp mai l’impunitat amb la quala nos an manipulada nòstra istòria. Cal, doncas, encoratjar aqueles istorians e cercaires per que perseguiscan lor prètzfach e n’incitar plan mai, al nivèl local o al nivèl nacional, a contunhar de descobrir l’autentica istòria del país.

En causa de qué butam totes los occitans, amb tota nòstra umilitat mas tanben amb tota la fòrça necita, a redescobrir nòstra istòria nacionala pròpria. Es pas malaisit: avèm de librariás a posita ont se pòt trobar de libres fòrça ben elaborats sul passatge d’Occitània per l’istòria del Mond; Internet ofrís tanben, per astre, de ressorsas e de pistas per o aprigondir. En 2025 es fòrça mai simple qu’en 1980 o 1060. Fagam doncas l’esfòrç. Qui coneis pas son passat pèrd son identitat e pòt pas afrontar son avenir.