Lo libre Confessions of an Economic Hit Man de John Perkins, publicat en 2004, es totjorn una lectura reveladoira dos decennis apuèi. L’autor foguèt un “sicari economic” al servici dels interèsses estatsunidencs, e prepausa una confession incomòda en explicant cossí las grandas corporacions e institucions financièras occidentalas an manipulada l’economia mondiala per contrarotlar politicament e economicament los païses en desvolopament.

Son prètzfach consistissiá a convéncer de govèrns de païses coma Indonesia, Panamà, l’Eqüator, Argentina o quitament l’anciana Pèrsia qu’acceptèsson de crèdits multimilionaris jos l’escampa d’ajudar al progrès e al desvolopament. Pasmens, tot aquel argent finançava de megaprojèctes atribuïts a de societats estatsunidencas, mentre que los païses contractavan de deutes que poirián pas jamai remborsar. En contrapartida, lor caliá cedir de ressorsas naturalas, d’influéncia geopolitica e, sovent, lor sobeiranetat.

Perkins descriu un sistèma que va fòrça mai luènh de la corrupcion pontuala: una autentica “corporatocracia” formada de govèrns, de bancas e de multinacionalas qu’agisson d’un biais coordenat per preservar lor dominacion mondiala. Es aital que l’ajuda al desvolopament ven la faciada aimabla d’un mecanisme de contraròtle economic.

Es esglasiant de remarcar la frejor amb la quala se parla d’eleccions manipuladas, o de caps d’estat coma Omar Torrijos o Jaime Roldós mòrts en de circonstàncias estranhas, o d’alianças coma la dels Estats Units amb l’Arabia Saudita fondadas sul petròli e sus l’argent. Tot aquò non pas coma excepcions, mas coma parts integrantas d’un sistèma planificat.

Aquel libre es pas solament una denóncia del passat, mas una clau per comprene lo present. Las guèrras comercialas, lo replegament geopolitic, las crisis migratòrias, la respelida de l’extrèma drecha o lo ressentiment cap a l’Occident dins fòrça parts del Mond tròban lor explica dins aquel contèxt. La mondializacion, luènh d’èsser una promesa de benèsser partejat, es sovent estada una atrapa pels mai febles.

PERKINS, John. Confessions of an Economic Hit Man. Berrett-Koehler Publishers, 2004. Publicat en francés coma Les Confessions d’un assassin financier. En espanhòl coma Confesiones de un gángster económico. E en italian coma Confessioni di un sicario dell’economia.