Los aimables legeires d’aqueste jornal nos excusaràn, uèi parlam tornarmai de nosautres. Coma informèrem la setmana passada, Jornalet a recebut lo sagèl d’engatjament etic que l’autreja lo Conselh de l’Informacion de Catalonha (CIC). Aquel sagèl certifica la professionalitat e lo seriós de Jornalet. Mai de 70 mèdias l’an.
 
Cresèm qu’un dels pilars fondamentals de la libertat e de la democracia son los mèdias, es pr’amor d’aquò que consideram que cal trabalhar amb tota la veracitat, lo rigor, lo respècte, l’independéncia e la coeréncia possibles. Lo CIC velha pel compliment estricte d’aqueles objectius e a gerit, dempuèi sa fondacion en 1997, mai de 600 denóncias.
 
En parallèl, cal dire tanben que lo certificat obliga sos responsables d’aver mai de suènh encara dins la mantenença dels nòstres objectius: informar sus l’actualitat occitana e donar la plaça a totas las opinions, se son respectuosas e educadas. Cresèm modèstament qu’o avèm reüssit e volèm far public lo nòstre engatjament d’o far encara mai dins l’avenir. Avèm de mai en mai de legeires, mai de collaboradors e mai d’opinants, e nos cal multiplicar los esfòrces per nos mancar pas jamai davant eles.
 
De rebucada, lo certificat nos obligarà tanben d’èsser fòrça atentius als comentaris que fasètz los legeires. Donam per fach qu’escrivètz totjorn de comentaris respectuoses e constructius, e mai se son critics; mas qualques còps i a de comentaris que passan las linhas exigiblas de l’educacion e del respècte. Aqueles comentaris son eliminats. Avertissèm que tre ara serem mai atentius que jamai. Sabèm qu’es una actitud pas brica agradiva: far lo policièr es totjorn un marrit ròtle. Mas o cal far per garentir, justament, la libertat dels autres legeires.