Es nascut un novèl jornal occitan. Se sona Jornalet e a sonque una tòca: servir Occitània coma mèdia independent. Es un jornal occitan, escrich en occitan e pensat per Occitània. Es, en fin de compte, un jornal modèrne per un país que vòl viure. Totes los païses an lo lor espaci nacional de comunicacion e Occitània pòt pas mai èsser una excepcion. Un país sens los sieus mèdias a sequestrats lo sieu imaginari collectiu e la siá vision del mond, perque recep e analisa las nòvas amb lo ponch de vista de qualqu'un mai.

Lo Jornalet es pas un jornal sectari, sens l'influéncia de cap de partit. Es pas un jornal pensat o fach contra degun; lo Jornalet es unicament en favor d’Occitània e de totas las iniciativas que fan avançar lo país dins los domenis cultural, educatiu, lingüistic, politic, economic, social e ecologic. I a de plaça per totas las voses del país, tant que seràn respectuosas e tolerantas. Lo Jornalet, dins aquel sens, non sonque publica de nòvas e d'entrevistas, mas es tanben un endrech participatiu ont totes podèm aver la nòstra opinion e i exprimir lo nòstre vejaire.

Per rapòrt a la lenga, lo Jornalet es un jornal escrich exclusivament en occitan. Normalament s’emplegarà l’occitan referencial, mas i aurà d'articles dins totes los dialèctes. Occitània es un país grand e ric lingüisticament, e tot aquò es un patrimòni que cal preservar e projectar dins l'avenidor. Lo jornal a sonque un limit: se publicarà pas que d'articles escriches en la nòrma classica fixada per Alibèrt e completada per lo CLO. Sèm conscients que s'agís d'un subjècte delicat, mas sèm tanben convencuts qu'una lenga modèrna a besonh de mèdias modèrnes. Al delà, lo jornal a las siás pòrtas dobèrtas a totes los jornalistas occitans que i voldràn participar.

Esperam qu'aqueste novèl jornal pòsca servir per tot aquò e èsser d'utilitat per totes los Occitans. Çò que nos agradariá mai es de contribuir a bastir l’espaci occitan de comunicacion. Serà impossible d'o far totes solets, e es per aquò que cal enfortir los mèdias que ja existisson e ne caldrà bastir maites. Sèm conscients que lo prètzfach es grand e las ressorsas son escarsas, mas esperam rompre los clichés e los complèxes amb l’ajuda de totes. Sèm pas perfièches e es plan segur que fasèm d'errors. Esperam alavetz que nos ajudaretz a melhorar amb los vòstres comentaris, criticas e aportacions. Fasètz-vos vòstre lo Jornalet perque lo Jornalet es de totes.