Son ja passats dos ans dempuèi que nasquèt Jornalet. Sèm pas las personas mai apropriadas per o dire, mas avèm la percepcion que per mantes occitans, legir aqueste quotidian es una abitud de cada jorn o de cada setmana. Es justament aquò la tòca que tot mèdia cèrca e es per aquò que podèm afirmar qu’avèm atengut una partida importanta de la nòstra tòca. Volèm, doncas, mercejar plan los legeires, los collaboradors, lo lingüista, los opinants e los amics que nos ajudan a far avançar aqueste projècte. E, solide, los anonciaires que nos ajudan a finançar e las institucions que nos donan tanben un còp de man. Res de tot aquò seriá pas possible se manquèsse qualqu’un d’aqueles elements qu’avèm mençonat.
 
Coma totjorn, podèm ofrir qualques donadas sul jornal. Pendent aqueles dos ans avèm agut mai de 430 000 vesitas qu’an dobèrt mai d’un milion de paginas. Avèm de legeires per tot lo Mond, mas la granda majoritat son de legeires residents en Occitània. Lo nombre de legeires monta cada mes. Es pas un aument notable, mas es permanent e sostengut, çò que demòstra que l’occitanisme avançarà pas a grandas cambadas, mas per mejan d’un trabalh persistent, infatigable e pacient. Per far una paret i cal metre totas las bricas d’aval en amont. Una donada fòrça considerabla: tres personas sus quatre que vesitan lo sit de Jornalet i tornan dins lo futur. Es un naut gra de fidelizacion que nos fa plan gaujoses.
 
Son passats dos ans, doncas, e demòra que l’opcion de contunhar. O farem pas totes sols. Son nascuts mai de mèdias en occitan e los que ja i èran son de mai en mai fòrts. L’espaci occitan de comunicacion, imprescindible se volèm superar l’alienacion mentala francesa e bastir una mentalitat collectiva occitana, es mai fòrt uèi que fa dos ans. E esperam que serà encara pus fòrt dins dos ans de mai. Per o far possible cal contunhar de trabalhar coma fins ara: amb persisténcia, sens donar cap de batalha per perduda e amb la flexibilitat necita per que l’occitanisme venga un movement unit e integrator. Nosautres i serem. Cada jorn.