Es evident que Jornalet a un grand interès e una granda preocupacion pel desvolopament social e normatiu de la lenga occitana. Aquel es, de fach, lo motor editorial d’aqueste jornal e la siá idèa generadora originala. Per aquò nos preocupa mai que mai la qualitat de la lenga e la competéncia dels sieus parlants. Comprene e saber parlar occitan es important, mas o es tanben d’aver una actitud dobèrta per ne melhorar la qualitat e aténher una màger competéncia, sustot en la lenga escricha.

Cal que los parlants de l’occitan, mai que mai los mai actius al nivèl social, vengan de referents dins los sieus entorns familhals, socials e del trabalh per la lor competéncia lingüistica. Cada occitanofòn descomplexat es un tresaur de la causa culturala occitana e deu èsser conscient de la siá responsabilitat. Lo futur de la lenga es pas solament a la portada dels academicians, dels elegits politics, dels professors de las Calandretas e dels militants occitanistas. S'ès a legir aqueste tèxt, jògas tanben un ròtle important en aquela aventura fascinanta qu'es la salvacion d’una cultura e d’una faiçon de veire lo mond. Cresèm alavetz qu'un occitanofòn n'a pas jamai pro e deu totjorn ensajar de melhorar la siá competéncia lingüistica.

Cap de lenga pòt subreviure se demòra solament a la portada dels elèits. Se lo pòble s'apròpria pas la lenga e a pas cap d'interès per la cultivar, l’occitan aurà pas de futur al delà dels murs espesses dels palaises de l’erudicion. Per aquela rason, Jornalet vòl encoratjar aqueles lectors que, benlèu amb excessiva modèstia o amb un complèxe injustificat, considèran qu'an un nivèl bas de competéncia lingüistica, e los vòl encoratjar a pèrdre la paur d’ausar far de comentaris dins las nòvas e las opinions del jornal. Avèm remarcat que los comentaris an un nivèl lingüistic fòrça bon, mas es evident que totes los nòstres legeires an pas la meteissa formacion. Cal doncas que l'occitan venga una causa de totes e nos cal pèrdre la paur de far d’errors perque, solament en ne fasent serem capables de las superar.