Se celèbra uèi d’eleccions al Parlament Europèu, endacòm sus lo vièlh continent. Es pr’amor d’aquò que dins aqueste editorial voldriam remembrar quicòm qu’aviam ja dich: aquelas eleccions que i son convocats de centenats de milions d’europèus èran un fach inimaginable dins la primièra mitat del sègle XX, quand las relacions entre los païses d’Euròpa èran puslèu de malfisança e plan sovent fòrça ostilas. La construccion europèa sembla de còps que va fòrça lentament, mas cal prene en compte los tempses dels procèsses istorics prigonds e veirem ben que l’unificacion europèa progrèssa a un ritme notable.
 
Mas sustot volèm insistir sus l’oportunitat d’aur qu’es l’Union Europèa (UE) per las minoritats nacionalas d’Euròpa coma Occitània. L’avenir de l’UE passarà inevitablament per un poder federal comun, amb sedença a Brussèlas, e per la delegacion del poder regional en d’unitats menoras. Los vièlhs estats delègan de competéncias cap amont, cap a Brussèlas, e cap aval, cap a las regions naturalas e istoricas. Amb una politica monetària, comerciala, defensiva e exteriora comuna, quin ròtle jogaràn los estats tradicionals? Quin ròtle jogaràn los govèrns francés, espanhòl e italian l’an 2100? O sabèm pas, mas probablament auràn mens de competéncias qu’ara, de la meteissa faiçon qu’es plan probable que Brussèlas n’aja mai, coma n’auràn tanben mai las regions occitanas, Aran e las Valadas. Es pr’amor d’aquò que totes los movements nacionals europèus actuals, coma lo basco, l’escocés, lo catalan o lo flamenc, son de movements prigondament europeïstas. Per la meteissa rason, son los grands movements imperialistas dels grands estats los mai reticents a la confluéncia europèa. Un exemple: lo Front Nacional.
 
Dich tot aquò, quala deu èsser l’estrategia del vòte occitanista dins aquelas eleccions?
 
Cal, solide, votar per de partits qu’ajan una escomesa europeïsta, que desarma los jacobins. Es tanben positiu de preferir aquelas listas que cèrquen d’alianças amb d’autres partits e que pòscan facilitar qu’un occitanista aja d’opcions d’èsser elegit eurodeputat. L’exemple dels còrs François Alfonsi deu pas passar inapercebut.
 
Iniciativa per Occitània cridava divendres passat a votar en favor de la lista “Occitània per una Euròpa dels Pòbles” dins la circonscripcion Sud-Oèst e en favor de de la lista “Regions e Pòbles Solidaris” dins la circonscripcion Sud-Èst. Per çò qu’es d’Aran, recomandava de votar per tota lista que siá catalana e independentista, perque son las solas formacions que sostenon la lenga occitana e lo caractèr nacional occitan d’Aran. La còla de Jornalet sosten aquel rasonament.