Dissabte passat, 21 de junh, la Fèsta de la Musica s’acabèt amb de susmautas davant La Tor deu Borrèu, al quartièr del Hedars, a Pau (Bearn). La sedença del movement d’esquèrra revolucionària occitana, Libertat, vegèt coma la polícia metiá fin d’una faiçon plan violenta als concèrts que Libertat aviá organizat. Un trentenat d’agents de polícia (municipala, nacionala, CRS e BAC), amb de flashballs e de gases lacrimogèns, anèron arrestar lo concèrt qu’aviá organizat l’esquèrra occitanista. Segon qualques testimoniatges, lo quartièr èra encerclat per mai d’un desenat de forgons de polícia a una ora. Tot aquò sembla un dispositiu exagerat per arrestar un concèrt. Sembla, puslèu, un dispositiu pensat per una violéncia premeditada.
 
Es evident qu’es pas possible, per las autoritats, de contrarotlar ni de manipular un local coma la Tor deu Borrèu, qu’es autogerit, que fonciona sens cap de subvencion, mas que trabalha la man dins la man amb la vida culturala e associativa de Pau, e qu’organiza d’activitats reüssidas per far conéisser los problèmas socials e nacionals d’Occitània. E a las autoritats, aquò lor agrada pas de pas poder contrarotlar aquò. De fach, es pas lo primièr còp en Occitània, e endacòm mai, que las autoritats ensajan de criminalizar un movement en provocant de violéncias.
 
Pau es, a l’ora d’ara, una de las paucas vilas d’Occitània que la lucha occitanista i es vesedoira. Se pòt veire pertot de pegasolets e de tags revendicatius, per la tèle podèm veire de drapèls occitans quand i passa lo Torn de França; e pendent las fèstas de Carnaval, las bandieròlas que revendican lo combat occitanista i son frequentas. Alavetz, es pas brica estranh que las autoritats vòlgan ensajar de criminalizar l’esquèrra occitanista. Nos cal prene consciéncia que mai de trabalh fan per la lenga e pel país, mai atacats seràn. La còla de Jornalet cresèm que la melhora responsa a aquela criminalizacion es de respondre pas a las agressions, mas de contunhar de caminar de cap a l’immortala. Aqueles ensages de criminalizar e estigmatizar lo combat occitanista, nos devon encoratjar.