E mai se França desvira l’agach, lo debat sul futur de l’energia nucleara es mai viu que jamai. Après lo tragic accident de la centrala de Fukushima, lo govèrn de Japon decidiguèt de barrar las siás 17 centralas nuclearas, e o a ja fach a una velocitat recòrd. A l’ora d’ara, dins lo país nipon i a pas cap de centrala nucleara en foncionament, e mai s’al moment de l’accident 34,5% de l’energia electrica del país èra d’origina nucleara.
 
Quicòm de parièr se passa en Alemanha. Lo govèrn de Berlin a decidit de barrar las siás 17 centralas nuclearas pels problèmas de seguretat que compòrtan e a acordat l’an 2022 coma data limit per o aver fach. Dins lo cas alemand, 22% de l’energia electrica proven de las siás centralas nuclearas. Jogar amb la seguretat de las personas e ipotecar l’avenir de desenats de generacions es una responsabilitat que los govèrns vòlon de mens en mens cargar sus las siás espatlas.
 
E França? Dins l’Estat francés i a 19 centralas nuclearas amb un total de 58 reactors, que produsisson mai de 75% de tota l’energia electrica. Fòrça d’aquelas centralas son en tèrras occitanas. Lo debat es dobèrt e cal pensar a de nòvas fonts d’energia, e ne sabèm qualques unas que son a bon mercat e inagotablas. Cal un debat en França sus l’avenir d’aquela energia e lo cal far sens demagogia e amb de rigor. Lo mond va en aquela direccion e França ne pòt pas restar en marge.