Las orrors dels conflictes armats en Gaza e en Ucraïna (amb la dramatica catastròfa aeriana de l’avion de Malaysia Airlines) an eclipsat mediaticament un autre conflicte de consequéncias umanitàrias fòrça màgers. S’agís de la terribla dobla guèrra siriana e iraquiana, qu’a ja causat de desenats de milièrs de mòrts e de milions de refugiats. Mentre que legissètz aqueste editorial, los islamistas extremistas de l’Estat Islamic (ancianament ÈIIS, Estat Islamic en Iraq e Siria) son a semenar la terror dins las zònas que contraròtlan, tant en Siria coma en Iraq. Lor objectiu son las minoritats nacionalas e religiosas. Aramèus, iaziditas e curds se veson obligats de fugir se vòlon pas èsser torturats, violats, venduts coma esclaus o decapitats. Dins qualques cases, mai que mai dins lo cas dels crestians, son crucificats.
 
A l’ora d’ara, Euròpa agacha cap a una autra direccion, e los Estats Units, qu’an lor responsabilitat dins la destabilizacion d’aquel territòri, an començat d’organizar d’atacs aerians contra los islamistas. Mas caldriá anar mai luènh e cercar las raices del problèma per evitar qu’aquelas orrors se passèsson.
 
I a pas una solucion unica a aquela tragèdia, mas la solucion es l’addicion d’una seguida de mesuras que caldriá entreprene tant aviat coma se pòt. La primièra es la creacion d’un Estat curd independent dins lo Curdistan iraquian. Aquel estat, que fonciona ja de facto, a demostrat la siá viabilitat, lo sieu bon foncionament democratic e una nauta capacitat defensiva, qu’a evitat la penetracion islamista dins aquel territòri. En segond luòc, cal que lo govèrn iraquian adòpte totas las mesuras necessàrias per afrontar la situacion e garentir la seguretat de sos ciutadans, en quitant sas corrupcions e sas divisions politicas. E cal, sustot, que talhe còp sec las vias de finançament d’aqueles grops islamistas, e mai s’aquò supausa de prene de mesuras contra las ricas monarquias del Golf Persic que los sostenon economicament.
 

 
 


_____
Jornalet 24 de julhet 2014. Mossol: fugida dels cresitans