Torna l’Escòla Occitana d’Estiu (EOE), qu’ongan se debanarà del 17 al 23 d’agost a Vilanuèva d’Òlt (Naut Agenés) en tot festejar son 40n anniversari.
 
De centenats per personas gaudiràn un còp de mai d’aquesta setmana d’immersion dins la lenga occitana, e participaràn als corses d’occitan dins totes los dialèctes. Al delà se fa tanben de talhièrs, d’animacions, de danças, de velhadas tradicionalas, de concèrts, de balètis… e los mai petits fan lors activitats en occitan dins l’Escoleta.
 
Malgrat son succès, l’EOE viu de moments complicats pr’amor de la crisi financièra. Las subvencions son pas mai çò qu’èran, e lo nombre de catalans que cada annada lo CAÒC i mena demenís. Mas l’EOE avança mercés a una organizacion de las melhoras de l’occitanisme que cal plan felicitar.
 
Mas sustot, cal dire que l’EOE es mai que mai un bastion de normalitat e quitament de libertat. L’EOE es un endrech on mantes occitans podèm conviure pendent una setmana qu’en occitan e a la faiçon occitana. Aquò es una pèça clau per bastir un país que vòl viure dins una lenga vièlha que se vòl pas calar. Jornalet i serà.