Fa qualques jorns publicàvem lo primièr bilanç annual de l’associacion Los Amics del Jornalet. Coma probablament ja sabètz, aquela associacion legalizada dins la Republica Francesa e nascuda al marge de Jornalet, a per tòca de sosténer, dins sas possibilitats, lo Jornalet al nivèl economic. Los aperaquí 50 sòcis pagan 20 èuros per an, qu’arriban gaireben totes a aqueste jornal numeric qu’ara sètz a legir. La quantitat es fòrça petita, gaireben simbolica. Que son 20 èuros, uèi? Lo prètz d’una bilheta pel cinèma e un entrepan? Lo prètz d’un libre? Lo còst de doas camisetas? Es cèrtament un còst plan petit per sosténer un jornal en lenga occitana. Es un prètz que la majoritat dels legeires pòdon pagar sens cap de problèma, en prenent en compte que se paga solament un còp per an.
 
Es pr’amor d’aquò que volèm far una crida a d’autres ciutadans occitans a jónher l’associacion dels Amics de Jornalet. Es vertat, e o avèm ja explicat, que lo finançament del jornal se basa sus la publicitat (institucionala o privada), mas es pas un secret que la crisi a provocat una baissa dins aquel domeni e de grèus retards de pagaments. Coma aquò, ara qu’avèm a pena dos ans e mièg de vida, l’accion dels Amics de Jornalet nos ajuda a pagar una partida dels còstes estructurals e tecnics d’aqueste jornal. Los volèm mercejar, encara un còp, de tot còr.
 
Ça que la, i a quicòm que volèm precisar ben: lo jornal que sètz a legir quitarà pas d’aparéisser cada jorn amb d’articles nòus e de nòvas opinions e quitarà pas d’èsser d’accès gratuit. O avèm ja escrich d’autres còps: la lenga occitana e l’espaci occitan de comunicacion son tròp fragils, a l’ora d’ara, e i podèm pas metre mai d’obstacles. Ont arribe pas l’argent i metrem mai d’oras panadas a la familha, al sòm e al trabalh. Quitarem pas de pedalar perque senon fariam tombar la bicicleta. Mas vos mercejarem plan se fasètz un gèst de solidaritat en tot venir sòcis dels Amics de Jornalet.