editorial
Internet, un ocean d’escasenças
Un dels problèmas essencials qu'avèm totjorn agut, los occitans, es la granda dificultat de nos connectar entre nosautres. Occitània es un país plan grand, amb una populacion fòrça dispersada e amb pro vilas importantas. Tot aquò a provocat que los occitans ajam pas una concepcion radiala del país nòstre. Occitània s’es vertebrada en malhum amb fòrça centres politics, culturals, economics e administratius que nos an dividit mai. S'a aqueste problèma general i apondèm la division de la lenga en dialèctes e varietats, pot arribar que los occitans ajam pauques ponches de contacte e de connexion. Demoram dins de realitats diferentas, l’esquina virada los unes als autres. “Divide et impera”, çò disián los romans, e avián rason.
Es un isolament de fòrça sègles, e sèm arribats a un tal ponch que i a d'occitans de Niça que pensan que vivon dins un país complètament diferent del país occitan de Pau. E vice versa. La manca de canals estables de comunicacion a tanben destrusit la consciéncia nacionala. Mas aquò pòt cambiar aicí e ara. L'encastre numeric esquiva totes los problèmas perque sus Internet, i a pas de frontièras, pas de divisions, pas de murs, e i s’aplica quitament pas l’article 2 de la Constitucion Francesa.
Es per aquò que lo ponch d'amassada de la comunitat occitana deu èsser l'encastre numeric. Seriá quicòm de bon se los occitans ne prenguèssem consciéncia e conquistèssem aquel espaci infinit que nos es estat dobèrt. Dins aquel sens, cal que los occitanofòns dobriscam de comptes sus Facebook, sus Twitter, fagam de webs en occitan sus las nòstras associacions o grops. L'encastre numeric es benlèu lo solet endrech ont la nòstra lenga a pas de barrièras ni de trucs, e ont pòt s'exprimir e se desvolopar en tota libertat e amb dignitat. Aprofechem-o. Daissar passar aquesta escasença seriá una error imperdonabla.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Utilizar Internet de segur !!
mas, sens vos comandar :
pas tombar dins la mitificacion per çò que los faits mòstran que :
- rasal social significa sovent (anirai pas duscas a totjorn) rasal a-social
- que l'espaci de libertat es entre las mans del monde de la moneda, de la publicitat, que tot çò qu'escribes es pas mai secret...
De mai, arribarai pas a parlar en 140 signes (e sens las mans !!)
Quand tot serà virtual, quna realitat aurem ?
Adiu Garric
"demòra necite d'unificar lo territòri per d'altres biaisses, coma per exemple un arc ferroviari de granda abrivada de Bordèu a Niça"
Soi d'acòrdi amb tu ... avèm rason de pas voler financiar una LGV que permetrà als tolosans canelats amb Paris d'arribar mai lèu sul Sant Lòc.
Totes los partits politics occitans (Libertat, Partit Occitan, Partit de la Nacion Occitana) son d'acòrdi per de mesuras linguisticas e culturalas ... deurian èsser d'acòrdi tanben per de mesuras economicas coma aquela d'un Tren Bordèu-Niça o Baiona-Niça ... tot aquò en ligason amb lo malhum local ... es pas la SNCF que o farà .... avèm besonh d'una Societat Occitana dels Camins de Ferre (SOCF) ... es èla que tornarà crear de linhas qu'existiguèron (ex Lemòtges-Tarba en tot passar per Agen e Aush) e que crearà de linhas nòvas e transversalas que lo nòstre pais n'a bravament mestièr.
Gèli Grande
Èra l'idèa en 2007 quan creèm lo Forum Occitania. A la debuta tot se debanava plan, d'un forum d'amic es devingut una petita comunautat virtuau. Avem hèit d'encontras interessantas sus lo plan intelectuau, (me sembla tanben qu'avem avut un petit costat "Meetic" per quauques uns...), dab monde d'Occitània sancera. Pensi que lo vejaire qu'èi uèi sus Occitània e l'occitanisme seré completament diferent. Avem tant de causas de har a nòste (e tant pauc de temps e de moneda per viatjar !) qu'es mauaisit d'anar córrer cada dimenjada a Tolosa o a Marselha o a Limòtges. Es pas dab una encontra annuau a l'Estivada que podem bastir ligams.
Lo forum es malurosament sus la fin. Facebook nos a prés lo costat "discussion per arríder", uèi las discussions ponchudas sus lo subjonctiu o l'estandartizacion de la lenga se hèsen dens los comentaris deus opinions de Girbau o Sumien sus Jornalet. (Compréni pas la hugida que constati de cap a Jornalet, hesem pas la mèsma causa me sembla).
Èi pas sabut animar (com au club Med) e guardar lo monde. Benlèu que lo peber d'un forum internet es l'anonimat, causa qu'avem pas dens nòsta "comunautat".
Una polida reflexion sus la comunicacion nòstra.
Mercés!
Òsca per aqueste editò. Lo manca de mediàs nacionals occitans es una empacha majora a l'existéncia d'Occitània, agravat per l'organizacion multipolara del territòri. Lo numeric es la possibilitat de bastir una mena de republica virtuala, e es absoludament vital que los Occitans - e pensi mai que mai a las escòlas - utilizen aquela aisina. Caquelà, demòra necite d'unificar lo territòri per d'altres biaisses, coma per exemple un arc ferroviari de granda abrivada de Bordèu a Niça, o la fargason d'una radiò e d'una TV nacionalas.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari