I a un domeni ont l’intervencion e l’escanament jacobin practicament an pas d’influéncia ni d’espaci. Es un domeni ont la libertat es granda e ont las barrièras son petitas. Sèm a parlar, evidentament, de l’univèrs de las tecnologias de l’informacion e la comunicacion e de tot çò que i a a veire, e mai que mai d’Internet. Es dins aquel espaci virtual, mas a l’encòp plan real, que la cultura e la lenga occitanas an un immens terren per i córrer, progressar e viure dins una cèrta normalitat. Malastrosament, los occitans sembla qu’ajam pas gaire d’interès per desvolopar aquel espaci. D’autras minoritats nacionalas, coma los bretons, los catalans o los bascos, n’an tirat un rendement plan naut, en arribant al grand succès d’obténer de domenis pròpris d’Internet (.bzh, .cat e .eus). Se i a qualque rason qu’empedisca lo domeni .occ o tot autre que nos corresponda? Òc, n’i a solament una: la manca de fòrça sociala e institucionala que sostenga una demanda d’aquelas caracteristicas.
 
Vertat es que i a d’exemples que nos fan pas pèrdre l’esperança. Los animators de la Wikipèdia en occitan son un exemple infatigable per tota la nacion occitana. An demostrat que la nòstra lenga es tan digna e tant utila coma quina autra que siá. La traduccion de logicials en lenga d’òc avança tanben mercés al trabalh abnegat e silenciós d’un grop petit de patriòtas occitans, que venon quitament de nos regalar amb lo domeni .òc.eu, ont avèm ja jornalet.òc.eu.
 
Caldriá que lor esfòrç trobèsse resson e sosten demest los occitans al moment de crompar de produches informatics. “Es tanben en lenga occitana?” Aquò es una question simpla que poiriam far cada còp que crompam un objècte tecnologic (un telefòn mobil, una tauleta, un televisor) o un logicial. Gaireben totjorn la responsa serà negativa, mas se sèm fòrça los qu’o demandam i aurà benlèu qualque cambiament. Çò segur, es que las grandas entrepresas se mouràn pas s’i a pas cap de demanda dels consumaires.
 
Lo combat numeric lo se cal prene seriosament. Avèm los espleches e las capacitats per combatre e ben capitar. L’occitan a ja demostrat sa vivacitat sus Facebook. Cal sautar sus nòus domenis numerics e i prene possession. Lo cas de Twitter, qu’en d’autras escasenças n’avèm parlat, es paradigmatic. S’aguèssem solament qualque dotzena d’usatgièrs actius sus Twitter en occitan seriá un grand pas endavant. Podèm crear de domenis ont l’usatge de la lenga occitana siá absoludament normal. Es pas un trabalh titanenc. Podèm començar d’o far uèi meteis. Pòdes començar d’o far tu meteis quand vendràs de legir aqueste article.