Fa tres ans que nasquèt aqueste jornal e, coma cada còp que fasèm un anniversari, consagram l’editorial a parlar de nosautres. E, coma cada còp qu’o fasèm, volèm portar tota l’informacion objectiva e quantitativa per ne rendre compte amb los legeires, qu’en fin de compte son los “accionaris” d’aqueste jornal. En tres annadas avèm agut 680 000 vesitas de part de 190 000 usatgièrs unics (en multiplicant per quatre los usatgièrs unics del primièr an), e eles an vesitat 1,8 milions de paginas. Dins cada vesita se dobrís una mejana de 2,6 articles. La part mai positiva es que lo 72% dels legeires o fan mai d’un còp e venon legeires abituals del nòstre jornal. La majoritat de vesitaires son dels territòris occitans, e mai se lo jornal recep de vesitaires de tota la planeta, es a dire qu’avèm agut de legeires de 157 païses del Mond. Per vilas, la primièra vila en nombre de vesitaires es Tolosa e París es la quatrena.
 
La sola donada negativa es qu’unicament lo 2,25% dels legeires an lor navigador d’Internet configurat en lenga occitana, una possibilitat qu’es ben reala mas que solament una partida minuscula de la populacion occitana fa. Ne profecham per vos encoratjar d’o far, perque aquò a pas cap d’impacte sul vòstre ordenador mas, per contra, es una donada qu’ajuda a visualizar la preséncia de l’occitan sul ret, e de rebucada poiriá qualque jorn encoratjar las grandas entrepresas a far de programas e de sistèmas operatius en la nòstra lenga. Se nosautres o demandam pas, cossí podèm esperar qu’una entrepresa plaçada en Califòrnia o en Japon emplegue la lenga occitana?
 
Globalament, al delà d’aqueste ponch, aquelas donadas ofrisson un bilanç plan positiu de l’impacte social de Jornalet e validan, encara un còp, que fasiá mestièr de verai de crear un jornal en occitan. Es pas vertat que los occitans vòlgan pas de mèdias en occitan. Aquò vòl dire que i a un espaci immens encara de cobrir amb de nòus mèdias e l’adaptacion lingüistica d’autres ja existents, coma pòdon èsser las televisions e las ràdios publicas, per exemple. Coma o avèm ja dich d’autres còps, los occitans an de besonh tanben d’un espaci occitan de comunicacion que nos explique la realitat amb un vejaire occitan. Una nacion se morís sens un espaci pròpri de comunicacion ont se pòsca veire rebatuda. Se los occitans consuman solament de mèdias franceses, venon fin finala de franceses, coma es natural e inevitable. Pr’amor d’aquò, dempuèi tres ans aqueste jornal es una pèira de mai per bastir la nòstra trencada de contencion e esperam qu’ansin, dins lo futur, sorgiscan mai de pèiras per far mai fòrta aquela paret. Fin finala, e coma cada an, volèm remembrar qu’aqueste mèdia es gratuit per totes e qu’aquò o cambiarem pas. Ça que la, avèm un deficit economic cada an e vos demandam donc, se nos volètz ajudar, de jónher l’associacion dels Amics de Jornalet.