Quita pas d’èsser ofensiu que las femnas del Mond ajan un jorn consagrat a elas, talament, coma se foguèsse lo Jorn Internacional de la Tèrra o lo Jorn Internacional de la Lucha contra lo Càncer. Destinar un jorn a una causa es un simptòma indubitable qu’aquela causa se pòrta en una situacion delicada. Per exemple, i a pas cap de Jorn Internacional del Comèrci ni cap de Jorn Internacional de la Guèrra. Que las femnas ajan un jorn consagrat es, lamentablament, la pròva evidenta d’una trista realitat.

Òm pòt pensar que las femnas europèas, e las de qualques autres endreches avançats, an pas de problèmas grèus. Es vertat sonque en partida. L’egalitat ensaja de se generalizar e la legislacion la defend davant lo masclisme, lo secutament o los abuses al trabalh. I a, evidentament, fòrça cases de violacion de lors dreches e la violéncia masclista s’arrèsta pas. Totun es innegable que nàisser en Euròpa, en Austràlia o en Canadà es melhor per una femna que dins d’autres endreches. Mas aquela relativa situacion confortabla de la femna occidentala nos deu pas far pèrdre la perspectiva: la majoritat de las femnas de la planeta vivon dins d’endreches ont l’egalitat dels genres es de sciéncia-ficcion.

La còla de Jornalet nos volèm solament solidarizar amb las femnas oprimidas del Mond e far una crida a l’atencion sus la grevissima injustícia que patisson dins totes los païses de la planeta. Las femnas europèas an luchat per una egalitat amb fòrça mancas e es lo trabalh de totes de demostrar al Mond que la discriminacion de la femna es una malautiá masclista e fanatica que se pòt combatre e destruire. Esperam que qualque jorn, poirem escafar del calendièr lo Jorn Internacional de la Femna e consagrar lo 8 de març a festejar lo Jorn de l’Egalitat dels Genres.