Se i a quicòm qu’enfècta un catalan es qu’òm parle de Gerona, de Lérida, de San Cucufate o de Figueras en mespresant los toponims catalans naturals e legals, que son Girona, Lleida (en occitan Lhèida), Sant Cugat o Figueres. La primièra mesura que la dicta quin regim que siá que vòl destruire una cultura es de ne cambiar la toponimia e de l’adaptar a la lenga mai fòrta. Es un fach classic e recurrent que se repetís dins totes los endreches ont se practica un culturicidi. En Occitània o sabèm pro plan. Es donc particularament lamentable que la television publica catalana, TV3, aja emplegat sistematicament la toponimia francesa per rapòrt al tristissim accident d’avion que tombèt sul Pueg dels Tres Evescats, près de Barcilona de Provença e de Dinha. Aquela television a parlat sistematicament de Barcelonnette* (sic) e de Digne-les-Bains* (sic), quitament dins son edicion en aranés, en exibissent son mesprètz mai absolut de la lenga occitana.
 
Davant las criticas qu’a provocat, la television catalana se defend en disent qu’o marca aital lo sieu libre d’estil, que ditz efectivament que cal solament respectar la toponimia occitana dins lo cas de la Val d’Aran. Remarca tanben que cal respectar la toponimia catalana dins lo cas de Catalonha Nòrd, mas lo respècte que mòstran s’acaba aquí. Per la rèsta, la francizacion lor va plan. Tot aquò poiriá èsser fruch de l’ignorància, de la negligéncia o d’una manca d’interès criticabla, mas tot aquò es encara mai grèu perque la lenga occitana es oficiala en Catalonha, coma o ditz l’Estatut d’Autonomia de 2006 (article 6.5). L’actitud de TV3 es tanben mai que mai criticabla per son excepcionalitat: d’autres mèdias catalans, quitament qualques unes apertenent al meteis grop public que TV3, an ensajat en tot moment de mostrar un respècte professional de la lenga occitana en emplegant los tèrmes toponimics en occitan (o en version catalana, çò que nos sembla tanben legitim e comprensible).
 
Fin finala, e malgrat que qualqu’un o pòsca interpretar coma un cèrt acte de prepoténcia, la còla de Jornalet vòl far saber que s’ofrís, sens cap de còst ni cap de contraprestacion, per conselhar quin mèdia que siá sus la toponimia corrècta en lenga occitana. D’ara endavant, doncas, i a pas mai d’excusa per emplegar pas corrèctament la lenga d’òc amb los toponims d’Occitània.