Coma sabètz ben, aqueste jornal a començat una campanha de micromecenatge per afrontar qualques despensas de caractèr estructural inerentas a la quita existéncia de Jornalet: un ordenador nòu amb de melhoras competéncias tecnologicas e lo còst de l’albergament a Internet. En consequéncia, i a pas cap d’aspiracion a retribuir lo personal ni cap d’autra intencion darrièr aquel projècte. Las despensas de personal e la minima retribucion salariala que qualque còp podèm pagar sortisson de las intradas de publicitat, de qualque ajuda institucionala e, sustot, del trabalh remirable que fan los Amics de Jornalet (ne profecham per far una nòva crida als nòstres legeires per i aderir). Es causa coneguda que la transparéncia es un dels engatjaments d’aqueste jornal.
 
Avèm apelat a la solidaritat per aqueste projècte de micromecenatge, e sèm fòrtament esmoguts de veire que sèm arribats a l’objectiu a 27 jorns abans la fin de la campanha. Aquò es una reüssida collectiva de las bèlas, pas brica frequenta dins los sits de micromecenatge. Per nosautres, de trabalhar cada jorn al servici del país amb un ordenador pagat pel país, aquò serà un vam màger que nos encoratjarà bravament.
 
Dempuèi lo primièr jorn, disèm qu’aqueste jornal es una publicacion en linha gratuita, sens constrencha de pagament ni soscripcion de cap de sòrta. Sèm fòrtament convencuts que la precarietat dels mèdias en occitan e nacionalament centrats en Occitània es tan granda qu’o podèm pas complicar mai en fasent lo sit pagant. Sèm conscients qu’aqueste fach prejudica Jornalet, mas prejudicariá encara mai la comunicacion en occitan e los nòstres legeires. A l’ora de far de sacrificis, preferissèm de los far nosautres e non que los fagan los legeires.
 
Ça que la, vos volèm encoratjar a participar encara a aqueste projècte de micromecenatge. Tot l’argent que vendrà dins aqueles 25 jorns que rèstan serà emplegat en melhorar lo produch, e sustot nos ajudarà a pagar lo viatge per participar ongan a l’Estivada, a l’Escòla Occitana d’Estiu e a d’autres eveniments, per i organizar d’assembladas de legeires e rendre Jornalet mai participatiu encara, per fin que pòsca venir, de verai, un jornal de totes e per totes los occitans, e tanben per los amics d’Occitània.
 
Naturalament, cercam pas cap de don de las personas al caumatge, retiradas, estudiantas o que subisson un marrit moment economic. Mas pensam qu’un apòrt pontual de 10 o 25 o 50 èuros pòt èsser una contribucion fòrça pichona per una persona amb un salari normal o amb una pension generosa. De segur, es una contribucion menora, mas representa una ajuda màger per Jornalet e aquò nos encoratja de veire que los nòstres legeires sentisson qu’aqueste jornal es lor e que velhan de manténer lo sieu avenir. De la meteissa faiçon que los legeires ja fan partida de la nòstra vida, volèm que sentiscatz que, maitot, Jornalet fa partida de la vòstra vida. Mercés plan.