Segon d’informacions arribadas a la redaccion de Jornalet, lo govèrn d’Argeria a començat de bastir un fichièr que i a enregistrats los escolans amb un nom d’ostal francés o que se sap qu’apertenon a de familhas crestianas. Segon las autoritats argerianas, en analisant solament lo prenom o lo nom d’ostal dels enfants se pòt deduire lor origina francesa o lor religion crestiana. Per exemple, una dròlla que li dison Marie es considerada crestiana e, en consequéncia, es compresa dins aquel fichièr en mans de las autoritats. An pas encara dich publicament quala serà la tòca d’aquel fichièr, mas podèm deduire aisidament qu’es pas, justament, per far de presents de Nadal a aqueles enfants.
 
Bon, aquesta informacion que venètz de legir es, evidentament, falsa. Se foguèsse verai seriá un escandal de proporcions majusculas que levariá una ondada de protèstas dins lo Mond entièr e particularament en Euròpa. La libertat es un concèpte fondamental de la nòstra societat e aquò compren, segur, la libertat religiosa. S’aquela informacion foguèsse verai, aqueles enfants serián dins un grèu perilh perque una lista coma aquela poiriá èsser l’anticambra d’una politica discriminatòria, repressiva o encara quicòm de pièger.
 
Alavetz, aquò s’es passat en cò nòstre. La comuna de Besièrs, contrarotlada pel sieu polemic cònsol, Robert Ménard, elegit gràcias al sosten del Front Nacional, a fach un fichièr dels escolans de la vila que son musulmans a partir de lor prenom. Doncas, un enfant que li dison Ahmad es estat comprés en aquela lista. Qual sap se la lista que ven serà integrada per d’enfants josieus, a partir de prenoms coma Jacòb, Miriam o Raquèl. Es segur que la còla de Ménard aculhirà la proposicion amb estrambòrd. Per astre, sembla que las autoritats francesas an pres l’afar pro seriosament e an dobèrt una enquèsta. Esperem qu’ane fins a las darrièras consequéncias perque de comportaments d’aquela sòrta los cal tuar dins l’uòu. E esperam, tanben e sustot, que los ciutadans de Besièrs prengan aquel afar en compte e chifren plan abans de tornar votar per un cònsol que nos remembra automaticament l’Estat francés de Pétain.