Un an de mai, los jorns de l’Estivada de Rodés son plan soslinhats dins las agendas dels occitanistas e dels amants de la cultura. La programacion d’ongan es fantastica e excepcionala, mas sabèm ja, tre ara, que la programacion de l’an que ven serà encara mai fantastica e excepcionala. L’arma de l’Estivada, en Patric Roux, es un trabalhador infatigable e un occitanista convencut, que trabalha per dignificar la cultura e la lenga del país amb de critèris de rigor, modernitat e perfeccionisme que meritan tota la nòstra reconeissença.
 
Coma totjorn, i aurà de personas que se retrobaràn a Rodés, qu’es vengut lo ponch de contacte de referéncia entre los occitans venent dels quatre ponches cardinals. I a d’amics qu’an ja establit la lor amassada annala a Rodés, en enfortissent aital una convocacion que va delà la musica e la cultura. De vièlhs occitanistas que fa de temps que se veson pas sabon que, coma cada an, se retrobaràn en un concèrt, en un talhièr de cosina o en una conferéncia. Rodés es uèi un dels grands ponches de referéncia sociala per fòrça personas, e es bon que siá aital.

Occitània, coma o avèm dich d’autres còps, es un país enòrme, amb una granda diversitat culturala, païsatgistica, gastronomica, economica e sociala. Es per aquò que, se volèm aspirar a èsser un país normal, nos cal rescontrar mai, nos cal parlar mai, nos cal connectar mai e nos cal conéisser mai. Solament aital trencarem la fragmentacion e avançarem dins l’unitat. Occitània a de besonh de ponches d’amassada coma un peis a de besonh l’aiga. Rodés es un d’aqueles ponches d’amassada e per aquò la siá importància es fondamentala.