Totes los occitanistas de bona fe recebèrem amb gaug las paraulas de François Bayrou, quand exclamèt “qu’ei acabat lo temps de la vergonha!”. Èra un dels primièrs còps qu’un remarcable membre de la classa politica exagonala emplegava la lenga occitana per far una revendicacion en clau occitanista. Per aquela rason recebèt de grands aplaudiments e de mòstras de sosten. Semblava que, fin finala, los vents del cambiament començavan de bufar e pr’amor d’aquò, lo fach que Bayrou venguèsse cònsol de Pau foguèt coma dobrir una pòrta a l’esperança.
 
Totun, coma o publiquèt aqueste jornal dimècres passat, l’adjonch al cònsol de Pau, Sénher Lacoste, a decidit de cambiar lo Carnaval Bearnés. La comuna repròcha a l’associacion Carnaval Pantalonada d’organizar un Carnaval tròp tradicional “mancant de modernitat e d’interculturalitat”. Tè! Los meteisses arguments del temps de la vergonha, qu’encara uèi s’emplegan contra la practica de l’occitan.
 
Coma totes o sabèm, lo Carnaval Bearnés es una de las fèstas ont la lenga occitana es mai presenta, ont las cançons popularas las cantan en occitan los mai grands e los mai pichons, e ensems qu’an facha d’aquela fèsta la lor fèsta. Davant aquelas decisions destinadas a desnaturalizar l’eveniment, Carnaval Pantalonada a anonciat que renóncia a organizar lo carnaval l’an que ven, e es aital qu’après 30 ans, aquela manifestacion màger de la cultura occitana arribarà a sa fin se se tròba pas una solucion o qualqu’un que prenga lo brandon.
 
Cresèm onèstament que Bayrou a agut tòrt e son govèrn municipal a creat un problèma ont n’i aviá pas cap. Fins ara Carnaval foncionava plan dins la capitala de Bearn, èra un succès d’assisténcia e plaçava la vila de Pau dins lo grop de tèsta dins la defensa de la lenga e la cultura occitanas. Es possible que l’adjonch al cònsol siá estat mal conselhat. O es possible qu’aja pas remarcat las raices popularas qu’an assolidat lo festenal. Pr’amor d’aquò, amb tota la cortesiá e la bona fe, la còla de Jornalet demandam a la vila de Pau de reconsiderar sa decision, de començar las negociacions amb los organizaires del Carnaval Bearnés e de trobar una solucion. Demandam pas que d’unes sián los venceires e que los autres los vencuts. Demandam solament un dialòg sincèr e dobèrt que permeta a Pau de gardar un dels carnavals mai autentics del país.