Se sètz de legeires abituals de Jornalet saupretz qu’aqueste jornal activèt fa qualques setmanas un projècte de micromecenatge per garentir divèrsas despensas estructuralas ordinàrias e per aquerir un nòu ordenador. Demandàvem 3600 èuros e a la fin, mercés a la granda solidaritat e al supòrt de las gents, ne recebèrem 4885. Cap dels èuros addicionals obtenguts anarà dins las pòchas de la còla de Jornalet, que serviràn per finançar de melhoraments addicionals del portal e sustot los divèrses actes de promocion del jornal. Aquela experiéncia nos demostrèt, a nosautres e a totes, doas causas considerablas: que los occitans sèm dispausats a pagar una petita quantitat per far avançar de projèctes en clau de país e que l’autoorganizacion sens esperar cap de subvencion es un camin que fa fruch.
 
Fòrça autres pòbles e nacions d’Euròpa fa de temps qu’aprenguèron aquela leiçon. De fach, los Amics de Jornalet trabalhèron amb lo portal catalan de micromecenatge Tot Suma perque a l’ora d’ara i a pas cap de plataforma semblabla en Occitània amb una vision occitanista. Los bretons, qu’en tèrmes generals an un nivèl de consciéncia nacionala e politica mai accentuat que los occitans, an activat lor pròpri sit de micromecenatge per finançar de petits projèctes en clau de país breton. Ne parlàvem divendres dins aqueste jornal e lor desiram l’astre.
 
I a en cò nòstre divèrsas campanhas en cors per finançar de projèctes occitanistas. O avèm vist, per exemple, dins los cases de la Calandreta Gapiana e de la manifestacion de Montpelhièr. Dins los dos cases s’emplega la plataforma Ulule e nos sembla ben, mas seriá benlèu l’ora de perpensar al besonh de balhar al movement occitanista sa plataforma de micromecenatge. O demandam pas a las entitats culturalas ni als partits, mas a qualque entrepreneire amb l’enveja de ganhar qualques sòus e de rendre servici a la pàtria, pr’amor que far las doas causas es compatible. D’aquela manièra, mai d’un projècte en clau occitana poiràn èsser finançats e quin occitan que siá sauprà que i a un portal Internet ont, se vòl far un don de 10 o 20 èuros per ajudar lo país, i trobarà fòrça projèctes solvables, interessants e utils per Occitània. Qual se met al trabalh?