La question que pausa lo títol d’aqueste editorial es una question que, malastrosament, a pas de responsa. Puslèu, es possible qu’aja una responsa, mas a l’ora d’ara la coneissèm pas amb certitud. Pressentissèm que i a quicòm d’estranh que truca a l’entorn de l’Estivada de Rodés, lo melhor e lo mai grand festenal de las culturas occitanas que se celèbra dins lo país nòstre. Pendent fòrça annadas consecutivas, la capitala de Roergue es venguda l’epicentre de la lenga, la musica, la literatura e la fèsta occitanas. Es talament aital que Rodés es venguda una vila famosa e coneguda en tota Occitània per aquel fach, e lo director del festenal, En Patric Roux, es vengut una celebritat occitana. Alavetz, l’Estivada es un patrimòni de totes los occitans e tot çò que li pòsca arribar es una nòva de portada nacionala e un chepic per totes.
 
Sabèm ben qu’En Roux a anonciat publicament que dirigirà pas l’edicion que ven de l’Estivada de Rodés. N’a pas volgut explicar los motius publicament e s’es limitat a brandar de rasons personalas. Sus aquelas rasons personalas n’a pas volgut donar d’explicacions concretas, çò qu’a aumentat paradoxalament lo desir de saber çò que se passa amb l’Estivada. Lo mistèri e l’incertitud planan sus aquela question que, per sa condicion de festenal multitudinari e publicament subvencionat, requerís las maximalas transparéncia e informacion publicas. La sola causa qu’En Roux afirmèt es que la còla qu’a dirigit es perfièchament capabla de manténer viu lo festenal e que totas las regions occitanas sostenon l’Estivada. Saique seriá una bona causa que l’interès mediatic quitèsse d’èsser sus En Roux e que foguèsse la Comuna de Rodés qu’expliquèsse quals son sos plans per l’Estivada de l’an que ven, perqué i a agut un cambiament en la direccion e qui ne serà lo director en 2016. Las responsas a aquelas questions permetrián d’esclarzir un pauc la confusa situacion actuala.
 
Cossí que siá, dins aqueste estranh afar tot emplenat de mistèris, i a quicòm qu’es segur: Jornalet sostendrà incondicionalament quin que siá festenal cultural occitan, siá l’Estivada de Rodés, siá quin que siá autre festenal que se pòsca far dins quina que siá autra vila occitana, amb quin que siá nom e amb quin que siá director. La sola condicion que pausam es que siá un festenal vertadièrament occitan, e pas un succedanèu ont la cultura occitana siá lo maquilhatge superficial d’un festenal cultural francés. Nos cal, doncas, seguir aquela question e seguir la pista de Patric Roux: solament lo cal conéisser un pauc per saber que totjorn es a perpensar quicòm, qu’es un trabalhador infatigable e que sa leiautat a Occitània degun la pòt pas arrestar.
 
 
 
 

---

Jornalet 25.7.2015. Patric Roux: “Pòdi pas respondre a aquesta question e pòdi pas dire perqué”