Lo primièr cònsol de Besièrs, elegit gràcias al sosten de l’FN, a ja protagonizat divèrses episòdis de xenofobia e es quitament vengut una vedeta mediatica per sas accions racistas e sos comentaris polemics. Cal solament remembrar que, fa qualques meses, anoncièt son intencion de fichar los escolans de la vila supausadament musulmans amb un metòde pas brica rigorós: segon lor prenom. La tòca d’aquelas listas foguèt pas explicada per Ménard, mas la còla de Jornalet avèm la certitud qu’es pas la de mandar un present a cada enfant lo jorn de sa fèsta.
 
Ara, dins una nòva demostracion de tolerància e respècte, a anonciat son intencion de contrarotlar la dobertura de novèls restaurants kebap al centre istoric de Besièrs. Segon son vejaire, aquel tipe de mangisca fa pas partida de la cultura tradicionala de la vila. Poiriam èsser d’acòrdi sus aquel ponch, absoludament objectiu, mas alavetz la question que nos pausam es: se Ménard enebirà la dobertura dels restaurants japoneses de sushis, de las pizzariás italianas o dels snack-bars amb hamburgers, qu’elabòran tanben de noiriduras absoludament estrangièras a la vièlha gastronomia occitana? Nos demandam ingenuament se darrièr sa decision i a pas un fons discriminatòri o racista.
 
Se foguèsse lo cas, lo fach seriá fòrça grèu e inacceptable dins un país europèu democratic avançat. Los legeires d’aqueste jornal sabon ja que los editors considèran que França es pas un país europèu democratic avançat, e doncas amb tota probabilitat pas cap de procuraire ni cap d’administracion començarà pas cap d’enquèsta sus aqueste afar. Mas lo verdicte sus aquelas declaracions, e d’autras qu’a ja fach e que farà dins lo futur, reven als milièrs de ciutadans de Besièrs amb drech de vòte, que pòdon benlèu començar de pensar a la possibilitat que lor vila e lor cònsol poirián qualque jorn sortir dins los mèdias per de questions que lor farà pas crebar de vergonha.