Las scènas d’occitanofobia inacceptablas que se vivon regularament dins l’estat francés se son estendudas a l’estat espanhòl, ont i a agut tradicionalament un larg respècte social, politic e mediatic envèrs la lenga occitana, qu’es pròpria de la Val d’Aran. Aquel respècte se traduguèt, en 2010, per la consideracion legala de l’occitan en Catalonha coma lenga oficiala al costat de las lengas catalana e espanhòla. Es talament aital que la lenga es oficiala dins tot lo Principat de Catalonha, e mai se solament es lenga pròpria de la Val d’Aran.
 
En divèrsas escasenças, de deputats araneses se son exprimits en occitan dins lo Parlament de Catalonha, sens cap de sòrta de problèma ni de restriccion e en recebent un grand respècte dels autres deputats. O faguèron Francés Boya del PSC-PSÒE e Àlex Mòga de CDC, en seguissent l'exemple de Jusèp Loís Boya e de Pilar Busquets de CDC que parlèron ja en occitan dins las primièras sessions del Parlament de Catalonha après lo franquisme. Mas ara l’anóncia de Mireia Boya, de la CUP, de far totas sas intervencions en aranés dins lo Parlament de Catalonha a descadenat una avalanca d’occitanofobia pas jamai vista anteriorament. Boya es estada mespresada e insultada suls rets socials e dins las seccions dels comentaris dels jornals numerics. L’objectiu dels insultes, personificats en ela, van fòrça mai luènh, perque es una campanha d’insultes xenofòbs contra la Val d’Aran, contra Occitània tota e contra la lenga e la cultura occitanas.
 
Coma aquò se passa en França, quin progrès que siá de las lengas minorizadas es vist pels sectors mai imperialistas coma una agression contra la lenga dominanta d’imposicion qu’es lo francés. A tot aquò cal apondre lo fach que Catalonha se tròba dins un procès avançat d’autodeterminacion, de tal biais que los domenis mai retrograds se tròban dins un estat d’alèrta e d’isteria maximalas. Dins aquel sens, s’apond la circonstància que Boya es pas la sola deputada aranesa. Lo partit ultraespanholista Ciutadans a un deputat aranés, Javier Rivas. Ça que la, en conformitat amb l’espanholisme abitual d’aquel partit, lo deputat Rivas emplega unicament la lenga espanhòla dins sas activitats politicas e suls rets socials, en indicant aital qu’es plan “evident” lo respècte de Ciutadans per las identitats catalana e occitana.
 
 
 
 

---