Fa solament qualques jorns, un dels collaboradors mai presats de Jornaletpubliquèt un article d’opinion dins sa tribuna. En Terric Lausa evocava, dins son escrich, lo fach que las intradas son encara insufisentas per finançar totas las despensas del jornal que sètz a legir, e personalizava aquel fach sul capredactor, En Ferriòl Macip, que recep pas cap de remuneracion equivalenta al prètzfach que fa. Aquel article provoquèt una cèrta segotida: d’un costat Macip a recebut qualques dons generoses, de l’autre, l’associacion dels Amics de Jornalet, que sa tòca es lo sosten financièr del jornal, recebèt de cotizacions, tanben fòrça generosas. Tot aquel mond an ben comprés que Jornalet es un jornal de totes sos legeires, e doncas, ven a eles tanben, dins la mesura de lors possibilitats, de lo far viable.
 
Amb aqueste editorial volèm mercejar plan sincèrament l’amic Lausa per son article e totes los legeires e amics de Jornalet per lors dons. Mai que l’argent, es aquela reconeissença e solidaritat que nos pòrta lo vam que nos cal per vos ofrir aqueste jornal sèt jorns per setmana, 365 jorns per an (ongan 366). Un dels nòstres engatjaments constituents es qu’aqueste jornal es e serà gratuit, e d’accès liure a totas las personas del Mond que voldràn legir las informacions en occitan. Ça que la, que Jornalet siá gratuit per sos legeires vòl vas dire que se faga gratuitament, e per tant cal trobar un ponch d’equilibri que nos permeta de finançar d’una manièra establa, per qu’aqueste jornal contunhe d’èsser gratuit.
 
Aquò dich, volèm tanben profechar de l’ocasion per remembrar l’existéncia de l’associacion dels Amics de Jornalet, qu’ajudan a finançar lo jornal. Gràcias a lor accion generosa, Jornalet fonciona amb normalitat, malgrat las mancas sevèras que patissèm al moment de l’elaborar. Per tant volèm far una crida a totes los legeires per sosténer los Amics de Jornalet, e volèm mercejar tornarmai totes los sòcis d’aquela associacion, lor petit esfòrç que fa cadun d’eles es vital per nosautres.