La 19a edicion de la Dictada Occitana, que se faguèt fa qualques jorns, es estada tornarmai una reüssida organizativa e participativa d’aquela iniciativa lausabla que nasquèt en 1998 a Castras. Aquela grana a grelhat e ongan mai de 40 vilas an aculhit la Dictada. De centenats de personas, d’adultes e d’enfants, participèron a aquel rendètz-vos indefugible de la cultura e de la lenga occitana. Aquela fèsta de la lenga, delà son aspècte participatiu, a una granda vertut: convertís una simpla dictada en un acte revendicatiu d’una fòrça civica extraordinària. Es pas possible d’imaginar un imatge mai grafic, per un pòble que vòl viure, que de veire de desenats de personas segudas, amb papièr e estilo, e que son a escriure la lenga.
 
D’unes que i a considèran que la Dictada Occitana es un eveniment de caractèr folcloric e provincial, e la ridiculizan per la degradar e provocar la vergonha dels participants. Aquelas criticas, venent del jacobinisme mai reaccionari, son una pròva evidenta del succès de convocacion de cada annada. Davant las trufas, que per astre n’i a de mens en mens perque lo nacionalisme imperialista francés es en procès de descomposicion avançada, los occitans devèm respondre amb mai de civisme, amb mai de serenitat e amb mai de participacion. Mentre que d’unes son preocupats per l’avenir de l’accent circonflèxe en francés, d’autres nos consagram a salvar tota una lenga que rebat l’expression d’un pòble.
 
La còla de Jornalet desiram, un còp de mai, lo succès mai grand possible a las futuras edicions de la Dictada Occitana e vos prepausam un enjòc: que la 20a edicion de la Dictada se pòsca organizar dins 50 comunas. Es una chifra redonda per una edicion redonda. Doncas, volèm encoratjar totes los cercles, grops, associacions e partits occitanistas a organizar l’an que ven la Dictada Occitana dins lor comuna per mostrar la granda vitalitat qu’a lo movement occitanista e donar l’oportunitat a totes de participar a aquel eveniment. Nos podèm ajudar?
 
 

---