Divendres passat aqueste jornal publicava una nòva que nos es arribada per mejan de nòstres confraires de Nationalia, qu’avèm amb eles un acòrdi de cooperacion. Apreniam que se prepara en Sud-Tiròl l’Europeada, çò es, la competicion europèa de fotbòl de las minoritats ont Occitània es representada, gràcias al remirable talent de l’Associacion Occitana de Fotbòl (AÒF), que fa plan d’annadas que trabalha per jónher tot lo país dins una meteissa esquipa e dins un meteis esperit.
 
L’Europeada se tendrà al meteis periòde que l’Eurocopa dels estats, e de milions
d’occitans seràn plan atentius a las partidas e, sens cap de sòrta de dobte, l’immensa majoritat sostendràn “los blaus”. Del meteis biais, en Aran mantes sostendràn l’esquipa d’Espanha del temps qu’en las Valadas òm sostendrà Itàlia. D’autres occitans tot simplament ignoraràn l’eveniment, perque lor agrada pas lo fotbòl o almens aquela competicion.
 
Mas en aquela escasença volèm far una crida a venir totes d’afogats de la seleccion occitana de fotbòl. Per un còp, lo país del rugbi deu venir fotbolaire, en seguissent l’Europeada. La nòstra seleccion nacionala de fotbòl merita mai d’atencion de la part de totes: dels amators, dels mèdias e de las nòstras institucions. Los nòstres jogaires devon percebre un país que reagís rapidament a cada partida e una nacion esmoguda a cada gòl. Los occitans nos cal èsser melhor informats, nos cal seguir la nòstra esquipa e, se podèm, nos cal desplaçar per veire las partidas. Es imperatiu que nascan per tota Occitània de grops de suportaires organizats que fagan còire lo país. Devèm festejar las reüssidas e las comentar sus Twitter, sus Facebook, al bar, al trabalh, per carrièras... Son paucas las escasenças de rendre visibla Occitània dins lo Mond, e la nòstra esquipa nacionala de fotbòl n’es una excellenta ocasion.