Lo 27 de genièr passat, un trentenat de femnas de la CUP e d’autras organizacions de l’esquèrra independentista e anticapitalista s’acampèron a Barcelona per revendicar lor dobla condicion de femnas e de militantas engatjadas dins la lucha politica. Las femnas recitèron publicament davant los presents e davant los mèdias, sens sal ni òli, la cordelada d’insultes masclistas qu’avián patits publicament per “èsser de femnas e far de politica”. Demest elas i aviá la deputada aranesa, que foguèt victima d’insultes masclistas per revendicar l’occitan. Aquò se passèt fa mai de dos meses, ne raportèrem alavetz dins Jornalet, mas cresèm qu’o cal remembrar en ocasion de l’uèch de març, lo jorn internacional consacrat a la lucha per l’egalitat dels genres.
 
De còps los desacòrdis en politica venon d’insultes. Mas quand se manifèsta lo desacòrdi en disent a una femna qu’es “grassa”, “puta”, “laida” o “mal bicada”, aquesta quita d’èsser tractada coma un subjècte e ven un objècte. Aquel tipe d’agressions es fòrça grèu se prenem en compte que tanhon l’aspècte fisic e lo de la satisfaccion sexuala, mas qu’en cap de cas concernisson pas l’intellectualitat. Aquela sòrta d’agressions son lo rebat de las violéncias que las patisson las femnas del nòstre país totjorn valorizadas solament en foncion de lor beutat. En Occitània, las femnas son socialament obligadas de despensar un fum d’argent e d’esfòrces en estetica e mai d’una coneis la fam per èsser magra coma un maniquin. Las actituds masclistas son totjorn presentas dins totes los encastres de la nòstra societat. Aqueste jornal n’es tanplan una bona mòstra se fasètz la comparason de las tribunas d’opinion menadas per de femnas e las que son menadas per d’òmes. Es benlèu un rebat de la nòstra societat patriarcala? Se benlèu fasèm quicòm mal?
 
D’un costat, dins aqueste editorial volèm mercejar las femnas de la CUP per metre en evidéncia lo masclisme que patissèm totes e sovent nos es inapercebut. De l’autre volèm demandar als nòstres legeires que nos expliquen, dins los comentaris, aquelas experiéncias masclistas que tant las femnas coma los òmes patissèm abitualament.