La còla de Jornalet avèm condemnat, planhut e plorat lo masèl de Brussèlas coma plorèrem lo de París en novembre passat, de crimes atribuits a l’Estat Islamic. En mai d’aquò, aqueles fanatics sanguinaris tuan sens pietat de centenats de personas gaireben cada jorn, mai que mai a l’Orient Mejan e en Africa. Las victimas d’aquela còla d’assassins son sustot d’arabis musulmans (de tradicion o de fe), mas tanben de crestians, de curds, de iaziditas, de turcmèns, d’assirians… Imaginem un chaple d’aquela amplor, amb sa dolor e orror, cada jorn dins la nòstra vila e comprendrem qu’es çò que fugisson los refugiats.
 
Publicàvem dijòus passat una analisi de Vicent Partal que nos explicava que lo wahhabisme es una sècta minoritària de l’islam, qu’es la font d’aquel fondamentalisme fanatic e qu’a estendut considerablament son influéncia amb la creacion de centres d’estudis e de mosquetas pel Mond entièr, finançats amb l’ajuda dels recorses economics de la dinastia saudita. Tant los taliban, coma Al Qaida e l’Estat Islamic an lor font ideologica dins lo wahhabisme, que se coneis tanben amb lo nom de “salafisme saudita”. Lo centre de difusion mai grand del wahhabisme que i a en Euròpa es justament la mosqueta granda de Brussèlas finançada per l’Arabia Saudita.
 
Nos inquieta fòrça que los nòstres governants reagiscan a aquel problèma amb d’estats d’emergéncia, de perquisicions, de contraròtles e de repression, pr’amor que l’estat d’emergéncia implica una repression e una limitacion de las libertats individualas que desnatura las valors que volèm defendre fàcia al terrorisme, e fa pagar la populacion civila pels crimes dels terroristas. Es una barbaritat.
 
A qué nos servís tant de contraròtles frontalièrs, se lo president de França decòra lo prince eiretièr de l’Arabia Saudita? A qué nos servís que se fagan de perquisicions dins las banlègas, se l’Estat Islamic contunha de vendre de petròli e de crompar d’armas? A qué nos servís que s’expulsen los refugiats —principalas victimas de l’Estat Islamic e dels taliban— en Turquia a cambi d’argent, s’amb aquel argent se crompa de petròli a l’Estat Islamic?


Los wahhabistas serián pas mai qu’una còla d’ignorants fanatics coma lo Ku Kux Klan, s’avián pas l’argent e lo sosten de païses coma l’Arabia Saudita. Per tant cal que los govèrns d’occident càmbien radicalament lor tolerància e permissivitat envèrs lo regim saudita. En mai d’aquò, cal sosténer los musulmans del Mond entièr que luchan contra aquel integrisme, e cal considerar l’islam europèu coma un aliat que nos ajudarà a combatre lo wahhabisme. Se contunham de tractar los nòstres vesins musulmans coma d’estrangièrs, e contunham de los secutar amb lo nòstre racisme islamofòb, de mai en creissent, farem pas res. D'opausar las personas de tradicion crestiana contra las de tradicion musulmana solament favorís l’Estat Islamic. Lo malaür dels atemptats alimenta los comportaments racistas e islamofòbs, mas es prioritari de luchar contra aquò. Dins las banlègas d’Euròpa majoritàriament musulmanas, i abitan de joves de mai en mai paures, victimas de las politicas europèas de reduccions budgetàrias e d'austeritat, que punisson totjorn los mai paures. Cal evitar que los joves sens avenir d’aqueles quartièrs considèren coma una possibilitat desesperada lor adesion al jihadisme internacional, mai que mai se son de victimas del racisme dins lor país.
 
Enfin, basta de veire que lo camin qu’an seguit Euròpa e los Estats Units per combatre lo terrorisme jihadista dins los darrièrs quinze ans, a solament agravat la situacion.

A boy holds a placard expressing sympathy for the victims of the Brussels attacks at a makeshift camp near Idomeni pic.twitter.com/t0X0Pa5q3p

— AFP Photo Department (@AFPphoto) 22 de març de 2016