A Tolosa n’an un confle de las mesuras de seguretat de la Republica Francesa. Raportàvem dijòus passat qu’ongan la Fèsta de la Musica se tendrà a pòrta barrada e caldrà demandar personalament a la comuna un braçalet d’acreditacion per intrar sus la plaça del Capitòli lo 21 de junh. Las personas qu’arribaràn a accedir a la plaça —un espaci public— per gaudir dels concèrts, poiràn èsser somesas a d’escorcolhs, pas sonque de lors afars personals mas tanben corporals. Aquò a menat lo movement Nuèch de Pè de Tolosa a organizat una protèsta en encoratjant las gents a reservar d’intradas, a anar quèrre lo braçalet e a intrar pas sus la plaça, en tot protestant a l’exterior del perimètre. Dins aquela dralha, lo movement occitanista a convocat una cantèra de protèsta per reclamar una fèsta de la musica populara e enrasigada sul territòri. 
 
Dins aquelas circonstàncias, lo 21 de junh que ven se tendrà a Tolosa una protèsta fòrça importanta. Dins un encastre de lucha per nòstras libertats e dignitats personalas, se reclamarà una fèsta populara e se farà en occitan a la faiçon occitana. Es aquí que cal mostrar a tot aquel mond que la lucha sociala e nacionala son dins la meteissa dralha. Per recuperar l’environament es important de recuperar l’occitan, e per recuperar las libertats es important de recuperar la consciéncia d’èsser occitans.
 
La còla de Jornalet sostenèm d’a fons aquela protèsta e encoratjam totes los occitans que poiràn a se gandir a Tolosa lo 21 de junh que ven. La subrevida d’un movement politic occitan serà possibla sonque se se religa los axes nacional e social, que, tot comptat e rebatut, ne son pas qu’un: lo benèsser e la dignitat dels ciutadans. La Nuèch de Pè a mes en evidéncia lo costat social del malèsser rapòrt a la politica e al sistèma economic. Es la responsabilitat de totes de far visibla la causa occitana. Es pas cada jorn qu’avèm l’escasença d’o far e demòra pas gaire de temps per remontar, per quitar la vergonha e lo complèxe d’inferioritat. L’occitanisme se bastís uèi sus las idèas de progrès, sus l’inclusion e sus la presa de consciéncia davant los imperialismes e los faissismes. Mas per çò far, manca doas causas. La primièra es d’i creire, creire qu’es possible de construire una alternativa a partir de las rasics. Non pas del biais qu’o vòl lo faissisme, en tornant enrè, als temps glorioses, a la nacion pura. Volèm tornar a las rasics per tal de cometre pas las errors del passat, nimai daissar los autres las cometre contra nosautres. Pr’amor que cal saber qué s’es passat aicí, e ne cal prene consciéncia. Aital, en essent al centre de la politica, Occitània serà capabla de s’articular al nivèl social e d’ofrir de solucions a las siás gents. E I’escomesa del 21 de junh es un passatge incontornable sus aqueste camin.