Los arquitèctes del sistèma educatiu francés, autentic boçon de la purificacion lingüistica de la Republica Francesa dempuèi dos sègles, sabon perfièchament que las lengas dels pòbles de França se salvaràn solament se son obligatòrias dins lo sistèma educatiu. Per aquela rason, las far venir facultativas, amb d’oraris marrits e en concurréncia amb d’autras matèrias, equival a metre la lenga occitana jos la guilhotina de l’educacion “nacionala” francesa. E l’an mesa amb la reforma de l’educacion per los collègis. L’ensenhament de la lenga nòstra quitarà d’èsser una disciplina e vendrà una practica de caractèr interdisciplinari, amb una ora setmanièra, en concurréncia amb d’autras matèrias e amb caractèr volontari. Es un pas endarrièr quitament per rapòrt a la lei francesa de l’educacion de 2013.
 
Sèm pas a dramatizar. Totas las associacions restacadas a l’ensenhament de las lengas mal dichas regionalas se son mobilizadas contra, tant la FÈLCO d’Occitània coma Ikas-Bi del Bascoat, e mai per totas las autras lengas. De mai, lo Collectiu dels Mespresats de Peiregòrd a menat una lucha infatigabla amb de manifestacions, rassemblaments e protèstas d’autra sòrta e an quitament portat la reforma en justícia. Mas lo govèrn francés fa çò que vòl sens escotar lo pòble. S’es demostrat qu’es capable d’impausar d’un biais autoritari sa reforma del còde del trabalh qu’a levat una contestacion sociala enòrma, es ben dispausat a mespresar la nòstra cultura sens cap de remòrs.
 
Après totas las protèstas que venèm d’enumerar, ara avèm aprés qu’Iniciativa per Occitània se bat per defendre l’ensenhament de l’occitan dins qualques establiments de Provença ont es tanplan menaçat. A partir de la rintrada de 2016, l’ensenhament de l’occitan serà suprimit (o en cors de supression) dins los licèus e collègis de Manòsca, Aurenja, Chastèu Arnós, Cadenet, Cavalhon, Costelet, Tarascon… Per aquela rason, an lançat una peticion en linha qu’a amassat mai de 800 signaturas e cridan a manifestar dimars que ven a 10 oras del matin davant lo Licèu Fèlix Esclangon de Manòsca. La còla d’Iniciativa per Occitània exigís “lo mantenement e desvolopament dei cors d’occitan ara menaçats”, e mai, “una ofèrta generalizada de cors d’occitan dins totei leis escòlas e dins totei lei domenis de formacion de la mairala a l’universitat”. An rason.
 
La còla de Jornalet podèm pas pus demorar inèrts davant lo clavièr e l’ecran de l’ordenador. Aqueste dimars serem a Manòsca. Encoratjam totes los legeires que i poiràn anar que nos acompanhen.