Un nòu eveniment cultural a vist la lutz en Occitània, lo Forum Euroregional Patrimòni e Creacion. Dempuèi divendres passat, Castèlnòu d’Arri (Lauragués) es vengut l’epicentre de la lenga, la musica, la literatura e la fèsta occitanas, e tanben de l’afrairament cultural amb los Païses Catalans. Durant los jorns del festenal, la nòstra lenga e la nòstra cultura se son mostradas plan vivas dins l’encastre de la creacion audiovisuala, del teatre, de las musicas actualas, del patrimòni cultural immaterial e de la gastronomia. Es en occitan —e a la faiçon occitana— que se son debanadas las seradas, los concèrts, lo teatre, los passacarrièras, los talhièrs, los balètis... Es en occitan qu’a participat activament lo public de totes los atges e de totas las sensibilitats.
 
Remarquem un fach que nos sembla fòrça important. Los eveniments del festenal son estats gratuits per totes. L’accès a la lenga e a la cultura del país deu pas èsser pagant, almens dins la situacion d’afebliment que la nòstra cultura e la nòstra lenga se i tròban a l’ora d’ara. Es pr’amor d’aquò que Jornalet, maldespièch las nòstras enòrmas dificultats economicas, es de caractèr gratuit.
 
Arunan, lo 2 d’agost, publicàvem un editorial inquiet sus l’avenir de l’Estivada. Ongan, la còla de Jornalet vesèm amb grand chepic la seguida del festenal rodanés. D’un costat constatam un programa formidable amb la crèma de la crèma dels artistas d’expression occitana. De l’autre costat, constatam un sit web unicament en francés e una manca de vam, de complicitat e sustot, d’engatjament per reviscolar l’occitan. Veirem ben.
 
Ça que la, disiam dins aquel editorial, que “Jornalet sostendrà incondicionalament quin que siá festenal cultural occitan, siá l’Estivada de Rodés, siá quin que siá autre festenal que se pòsca far dins quina que siá autra vila occitana, amb quin que siá nom e amb quin que siá director. La sola condicion que pausam es que siá un festenal vertadièrament occitan, e pas un succedanèu ont la cultura occitana siá lo maquilhatge superficial d’un festenal cultural francés”. Es per tant, qu’après çò qu’avèm vist a Castèlnòu d’Arri, Jornalet sostenèm energicament lo Forum Euroregional Patrimòni e Creacion e felicitam la còla dirigida per Danís Chapduelh. Esperam qu’aquel eveniment se consolide e ofrissèm a la còla lo nòstre sosten e la nòstra collaboracion.