Lo DASEN del departament de Gard, Christian Patoz, a explicat perqué a enebit lo rassemblament pedagogic occitan dins aquel departament: per evitar que los nòstres escolans sián tòca dels terroristas. “Malaürosament los eveniments mai recents mòstran coma la violéncia cèga pòt picar ont que siá e cossí un rassemblament de plusors centenats de personas pòt èsser una font de perilh”, çò ditz, dins sa letra, coma ben la publicam uèi dins las actualitats de Jornalet.
 
La còla de Jornalet volèm presentar las nòstras desencusas a Sénher Patoz. Quand nos assabentèrem en junh passat de l’enebicion d’aquel eveniment, aviam pensat de mal de Sénher lo DASEN, en tot creire que son accion èra dirigida contra la lenga occitana amb la ferma intencion d’empedir la realizacion d’un rassemblament pedagogic occitanofòn qu’existís dempuèi 20 ans e amassa cada annada mai de 1500 escolans. Mas ara vesèm qu’en realitat Sénher Patoz se preocupa dels nòstres escolans e lor vòl salvar la vida en davançant las estrategias de l’autoproclamat Estat Islamic.
 
Per mercejar Sénher Patoz, e las autoritats francesas en general, la còla de Jornalet nos permetèm de suggerir qualques eveniments qu’amassan de molonadas (que poirián èsser tanben tòca dels atemptats) e que se poirián tanben enebir: lo festenal de Lemosin nomenat Lesfrancophonies en Limousin, la mobilizacion de la joventut francofòna, las finalas de las copas de fotbòl e de rugbi, lo mondial de l’automobil, la Fashion Week de París e tant d’autres.
 
Lor salvar la vida es important.