Comença l’an 2017, un an que Jornalet vòl festejar plan especialament, car lo 31 de març que ven lo vòstre quotidian en linha aurà cinc ans. Per tant, volèm consagrar tota aquesta annada que comença a celebrar lo cinquen anniversari amb los nòstres legeires.
 
Dins aquel sens, avèm previstas divèrsas assembladas de legeires de Jornalet a travèrs d'Occitània tota amb la tòca de nos rescontrar, discutir, nos coneisser personalament, amassar d’idèas, de suggestions, de proposicions de melhorament e tot çò que caldrà per far que Jornalet siá un jornal de totes e per totes.
 
Per ara es confirmat que nos rescontrarem dins lo primièr trimèstre de l’an a Marselha, e puèi a Narbona. E se nos arribèsse qualque subvencion, o voldriam celebrar acompanhats d’un bon concèrt, car sèm un país de bons artistas. Avèm tanben previst de nos rescontrar en Aran, a Bordèu, a Tolosa e a Pau, e èsser presents dins los eveniments màgers de l’occitanisme. E per pèrdre pas lo nòrd voldriam ben organizar quicòm en Peiregòrd, Lemosin, Auvèrnhe, Velai, Daufinat e las Valadas. Per aquela rason, dins aqueste editorial fasèm una crida als que nos legisson al país per fin que vòlgan organizar una assemblada de legeires de Jornalet. Solament cal organizar un rescontre, e s’es possible amb una velhada, e nos ofrir un lièch per dormir una nuèch.
 
Per organizar una assemblada de legeires de Jornalet, e s’es possible que se tenga una velhada en çò vòstre, escrivètz a info(a)jornalet.com e nos metrem d’acòrdi  per lo luòc e la data.
 
 
“Bon jorn des aninòs!”
 
La còla de Jornalet desiram una bona annada als legeires d’aqueste jornal  e profecham de l’ocasion per seguir la tradicion aranesa de demandar los “aninòs” a tot lo mond que nos legisson.
 
Es un miracle d’èsser encara aicí après cinc ans. Jornalet se fa totjorn dins de condicions economicas precàrias e en raubant lo temps al sòm, a la familha e a l’amor. La recèpta secreta es lo brave retorn dels milièrs de legeires que fan de l’occitan una lenga de vida per mejan d’aqueste jornal.
 
Volèm plan mercejar las ajudas e los sostens que nos venon de la Generalitat de Catalonha, del Conselh Generau d’Aran e de Convergéncia Occitana e las que nos son arribadas de Macarèl, d’Adishatz, e dels nombroses legeires anonims que fan de dons generoses. E volèm mercejar plan especialament tot lo vam que nos arriba dels legeires que son venguts de sòcis de l’associacion dels Amics de Jornalet (de drech francés) o de l’Associacion per la Difusion d’Occitània en Catalonha (de drech espanhòl).
 
Esperam que 2017 nos pòrte lo sosten de l’Ofici Public de la Lenga Occitana, de l’Euroregion Pirenèus-Mediterranèa, e que poirem far de causas amassa amb lo CIRDÒC, amb Òc Malhòrca, e amb la FIMÒC, que ne sèm fièrs de far partida.
 
 
 
 

---

Clicatz aicí per venir de sòcis dels Amics de Jornalet o ben de l’ADÒC.