Las parets de veire del Musèu de las Civilizacions d’Euròpa e de la Mediterranèa a Marselha (MUCÈM) presentan ara tanben en occitan l’article catòrze de la Declaracion Universala dels Dreches Umans. “Un pichòt pas pel MUCÈM, un grand pas per l'occitan!”, çò disiá un legeire dins sos comentaris. Aquela reüssida es arribada gràcias a l’accion de protèsta organizada per dos òmes solets, que recebèron lo sosten d’un ponhat de militants occitanistas e que Jornalet ne faguèt resson.
 
Aquela petita còla de valents se quilhèron estoïcament lo 17 de decembre passat per revendicar que lo tèxt d’aquel article, present dins sèt lengas, o foguèsse tanben dins la lenga del país. Per aquela rason, i despleguèron de 12h a 16h una bandeiròla de dos mètres que pòrta lo tèxt en occitan que manca. “Còntra lei persecucions cadun a drech de cercar asil e de beneficiar de l’asil dins d’autrei país”, çò ditz l’article en question, segon la bandeiròla que tenguèron, e ara se pòt veire amb tota dignitat sus la paret del musèu.
 
L’accion del MUCÈM seguissiá una iniciativa de Danís Capian. L’acompanhavan son amic Mickaël Neyrolles, qualques militants d’Iniciativa per Occitània e una representacion de l’Ostau dau País Marselhés. Òsca per eles!
 
Dins un editorial precedent, ont saludàvem aquela accion, qualifiquèrem d’eròis aquela còla de valents, e ara, nos regaudissèm de saludar lor succès. En despièch dels comentaris negatius de qualques legeires, que cresián qu’aquela accion serviriá pas a res, s’es ara demostrat que quand òm reclama, òm pòt reüssir, mai que mai se se fa una demanda concreta, facha d’un biais positiu e  que se mòstre clarament que çò demandat es de justícia. En mai d’aquò, ara es demostrat que l’iniciativa d’una sola persona pòt plan capitar e que se nos amassèssem mai, poiriam aténher d’objectius pus bèls. “Tot es de far e tot es possible”, çò disiá lo poèta catalan Miquel Martí i Pol.