Se sarra la 20a edicion de la Dictada Occitana, qu’ongan se tendrà dins mai de 40 vilas. La majoritat d’endreches la faràn dissabte 28 de genièr, e mai se dins cèrtas vilas se tendrà qualques jorns pus tard. Se tracta d’una jornada de promocion de la lenga e la cultura occitanas que consistís a realizar una dictada amb de prèmis pels participants, una iniciativa lausabla que nasquèt en 1998 a Castras. Aquela grana a grelhat e, vint ans puèi, mai de 40 vilas aculhiràn la Dictada. De centenats de personas, d’adultes e d’enfants, participan cada an a aquel rendètz-vos indefugible de la cultura e de la lenga occitanas.
 
Aquela fèsta de la lenga, delà son aspècte participatiu, a una granda vertut: convertís una simpla dictada en un acte revendicatiu d’una fòrça civica extraordinària. Es pas possible d’imaginar un imatge mai grafic, per un pòble que vòl viure, que de veire de desenats de personas assetadas, amb papièr e estilo, e que son a escriure la lenga.
 
La còla de Jornalet desiram, un còp de mai, lo succès mai grand possible a la 20a edicion de la Dictada e encoratjam los nòstres legeires a i participar. A la fin d’aqueste editorial trobaretz una lista amb d’entresenhas.
 
En mai d’aquò vos prepausam un desfís: fagam que l’eveniment siá una reüssida talament granda per tal que l’an que ven la Dictada se pòsca organizar dins un cinquantenat de vilas. Doncas, volèm encoratjar totes los cercles, grops, associacions e partits occitanistas a organizar l’an que ven la Dictada Occitana dins lor comuna per mostrar la granda vitalitat qu’a lo movement occitanista e donar l’oportunitat a totes de participar a aquel eveniment. I podètz ajudar?