Dins los cinc ans de vida de Jornalet avèm remarcat que l’occitan a totjorn sa plaça dins lo Mond, e que lo Mond vist, comprés e explicat a la faiçon occitana, es legit cada jorn per mai d’un milièr de personas, que quitament daissan de comentaris e crèan de debats mai o mens interessants. La còla de Jornalet sèm contents de nòstra modèsta contribucion a l’usatge social de l’occitan dins lo ret. Ça que la —delà la Val d’Aran e las Valadas— l’usatge social de l’occitan es practicament inexistent per carrièras, mas nos volèm pas resignar. Per aquela rason trabalham per poder viure e decidir al país amb dignitat, a l’occitana e en occitan. Cresèm qu’es important de trabalhar per desvelhar la consciéncia d’occitanitat, e es d’aitan pus important de transmetre la lenga. Dins aquel sens, l’escòla en occitan (o almens l’occitan a l’escòla) es un afar prioritari.
 
Las escòlas Calandreta refusan a cada rintrada qualques centenats d’escolans, car i a plan mai d’inscriches que de plaças. Cresèm que se deu passar aitant dins l’educacion publica. Aquò es, d’un latz, una marrida nòva, mas de l’autre es un indicador estrambordant que la consciéncia d’occitanitat es pas mòrta.
 
La tòca de Jornalet es de far un esplech jornalistic e informatiu per explicar tot çò que fa l’actualitat en Occitània e al Mond, en donar una plaça a totes los vejaires possibles e  en èsser dobèrt a la participacion extèrna per favorir qu’aqueste mèdia siá un esplech util e pròche. Volèm que se n’apròprien totes los agents que participan a la vida sociala, politica, educativa, esportiva e culturala del país.
 
Una de las seccions del jornal que cresèm pus importanta es la de l’escòla. E per la metre a jorn nos agradariá fòrça que las escòlas, que sián de Calandretas o d’escòlas bilingüas, pòscan elas meteissas emplir aquela seccion amb de nòvas, per que los quites escolans las pòscan redigir en explicar los faches que fan l’actualitat dins cada escòla: un eveniment cultural, la vesita d’una personalitat, una fèsta populara amb los parents, una competicion esportiva, etc. De tot segur, las fotografias, los enregistraments o las images vidèo seràn de tot en tot benvengudas, se n’i a.
 
Se cada escòla nos manda quatre o cinc nòvas per an, serem plan contents e satisfaches. Pensam que pòt èsser un bon luòc d’encontre per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans.