Dins un encastre politic ont los candidats prometon de politicas que mantengan l’statu quo de las reduccions budgetàrias, de la repression economica e sociala e de far perdurar longtemps las diferentas crisis que patissèm, lo terren es mai que favorable als populismes de tota sòrta. Se sèm pas capables de bastir d’aternativas progressistas, la neofaissistalha prendrà de mai en mai lo poder. Lo mond que votèron Donald Trump als Estats Units, o faguèron pas majoritàriament per que volián plaçar una barralha sus la frontièra de Mexic, mas per que volián de politicas desparièras. Se los representants politics son pas capables de bastir d’alternativas politicas convencentas, nos sarrarem de mai en mai a la situacion que patissiam dins los ans 1930, tanben a causa d’una crisi, en partida, economica, financièra. Los electors son de personas que patisson, e cercaràn totjorn quina alternativa que siá car an vertadièrament besonh d’un cambiament.
 
Per astre, dins qualques païses d’Euròpa an reüssit a bastir d’alternativas de cambiament progressistas qu’an ben capitat a arrestar l’espelida del neofaissisme, coma es lo cas d’Àustria.
 
Se sarra l’eleccion presidenciala de l’estat francés, e totes los sondatges preveson que lo Front Nacional passarà al segond torn. S’aquò arribava, poiriam èsser davant una situacion perilhosa ont los electors se trobarà que deuràn causir se vòlon las meteissas politicas o ben un cambiament radical. S’aquela situacion s’endeveniguèsse, auriam la causida de votar se volèm contunhar de nos far còire dins la padena, o ben se ne volèm sautar per tombar dins lo fuòc. E per ara sembla que tombariam dins lo fuòc tant se sautèssem pel costat drech coma pel costat esquèrre. En çò que tanh a la dignitat del pòble occitan e lo respècte de sa lenga e de sa cultura, l’ultradrechista Le Pen e l’ultraesquerrista Mélenchon defendon las meteissas politicas.
 
L’occitanisme a mandat una letra a totes los candidats en lor pausar de questions restacadas a de politicas que permeton lo desvolopament de l’occitan. Pel moment, solament quatre candidats i an denhat respondre, dont sonque dos son clarament favorables a la plena reconeissença e la subrevivença de nòstra cultura: Jean Lasalle (que respond en occitan e signa "Jan de Lassala") e Philippe Poutou que prepausa quitament lo drech d’autodeterminacion dels pòbles dins e fòra l’estat francés.