L’autoproclamat Estat Islamic (EI) es una organizacion criminala qu’apareis sobdament dins l’encastre de guèrras en Orient Mejan. Sabèm pas amb certitud qual es darrièr aquela organizacion, mas en vesent lors ressorsas d’armas e de propaganda, son generosament finançats per qualques unes que beneficiarián de tot aquel malastre. Tant l’EI, coma totes los fanatismes en general (que sián religioses, patriotics, esportius...) son basats sus l’òdi e l’intolerància. Se servisson d’aqueles sentiments negatius per que lors adèptes —dont fòrça son originaris d’Euròpa— pòscan cometre de crimes òrres qu’una persona sana d’esperit i poiriá quitament pas pensar, e los menan quitament al suicidi. Per reüssir, es important per l’EI que lo mond occidental semene l’islamofobia que lor permet de justificar lor òdi del mond occidental. Atal, se servisson del malaür e del patiment de fòrça joves de nòstres quartièrs marginalizats per captar d’adèptes, que vendràn de borrèls jihadistas.
 
Lo jihadisme fa servir l’islamofobia per alucar sa maquina de propaganda e transformar nòstres joves en nòstres bòias. Èra de preveire que l’Estat Islamic ensajariá d’organizar una ataca durant la campanha electorala de la presidenciala francesa, car li conven plan la victòria d’una opcion politica que semene l’islamofobia.
 
L’atemptat de dijòus passat a París nos rend plan tristes. D’un latz, per tota la dolor e lo patiment a l’entorn dels assassinats. De l’autre, per veire la miserabla e pietadosa instrumentalizacion que qualques candidats de la presidenciala faguèron del crime. D’unes demandavan la reïnstauracion de las frontièras e l’expulsion dels estrangièrs, d’autres prometián un plan de lucha contra lo terrorisme islamista s’èran elegits, e d’autres quitament gausavan d’afirmar que “sèm en guèrra”, que caliá causir entre “nosautres o eles”. Per contra, la còla de Jornalet cresèm que cal sosténer los musulmans del Mond entièr que luchan contra lo jihadisme. Nòstres vesins de tradicion musulmana devon èsser nòstres aliats màgers per combatre ensems l’Estat Islamic. De fach, d’organizacions musulmanas condemnan fermament los atemptats.
 
De remembrar que mai d’un bòia es nascut dins los quartièrs de nòstras vilas. De remembrar que l’immensa majoritat de las victimas del terrorisme jihadista son de ciutadans musulmans. De remembrar que los refugiats que fugisson la terror de la guèrra e del jihadisme, rescontran la vergonha e la xenofobia quand arriban dins l’Union Europèa. De remembrar que nòstres vesins de tradicion musulmana son de victimas dels atemptats, e mai riscan que lors mainatges tomben dins la trapèla de la propaganda jihadista e vengan de borrèls.