Après vesitar Carcassona l’8 de febrièr passat, Marselha lo 24 de març e Barcelona lo 27 d’abril, dijòus que ven serem a Narbona. En aquesta ocasion, la còla de l’Ostal Occitan de la vila aculhirà la quatrena “assemblada dels legeires de Jornalet” d’ongan, e la celebracion dels cinc ans d’aqueste mèdia amb un concertàs del Ministeri del Riddim.  L’assemblada de legeires vòl èsser una reünion dobèrta ont lo redactor en cap d’aqueste jornal en linha explicarà son trabalh de cada jorn, lo foncionament del mèdia, e escotarà totas las opinions dels legeires que participen a l’eveniment. Lo concèrt, que son entrada es gratuita, es un present subrebèl que nos fa la còla de l’Ostal Occitan de Narbona, e nos triga de festejar que sèm encara aicí al ritme del rub a dub.
 
Puèi, lo 26 de junh que ven, serem a Besièrs. La còla del CIRDÒC nos a preparat tanben un aculhiment enòrme, que lèu-lèu anonciarem.
 
 
Una fèsta occitana a Barcelona
 
Dins aquela linha de celebracions, lo 1r de julhet serem a Barcelona. La còla de Via Sona e del Centre Artesà Tradicionàrius (CAT) tanben nos an fach un present subrebèl: an mes la sala de concèrts del CAT, las installacions del sit e lo tecnician de son a nòstra disposicion, a gratis, per que i poscam organizar una fèsta occitana. E la farem en fasent dançar lo public de Catalonha amb la musica d’un dels melhors ambaissadors de l’Occitània modèrna e engatjada, los Goulamas-K. Al programa i aurà un cors d’occitan pel mond qu’auràn de curiositat per nòstra lenga, un sopar frairal, un balèti tradicional occitan amb Kaj Tiel Plu e lo concèrt de la còla de Puègserguièr.
 
Per poder afrontar l’organizacion del concèrt, pagar los artistas e los aculhir coma cal, avèm creat un projècte de microfinançament sul sit de TotSuma, que servís per recebre de dons e tanben per comprar las entradas de biais anticipat. Lo projècte es pensat pel public catalan que vendrà al concèrt, e las recompensas pels mecènas an la sabor e las colors d’Occitània e dels artistas que tocaràn. Lo mond que faràn de dons mas qu'assistiràn pas a l'eveniment, poiràn recebre per la pòsta de presents signats de la man dels artistas, dont una carta postala o de disques, en foncion del don.
 
De tot biais, nos agradariá que i aguèsse d’occitans aquí, e que los catalans interessats per descobrir nòstre país, nòstra lenga e nòstra cultura poguèsson escambiar e parlar amb de compatriòtas. Lo mond que voldràn venir a Barcelona pòdon escriure a la redaccion de Jornalet e ensajarem de lor cercar un bon aculhiment.
 


 
                  
 

fffff		fffff
	Long d’aqueste an 2017, Jornalet festeja son cinquen anniversari per tot lo país e voldriam èsser per Occitània tota, de Medoc a Ròia e d’Aran a Borbonés. Fasèm doncas una crida a totes los que vòlgan organizar una assemblada de legeires de Jornalet. Solament cal organizar un rescontre, e s’es possible amb una velhada, e nos ofrir un lièch per dormir una nuèch. Escrivètz a info(a)jornalet.com e nos metrem d’acòrdi  pel luòc e la data.