L’ultradrecha europèa, son racisme e son islamofobia an passat l’òsca. Ara se consagran a boicotar los salvaments dels refugiats en Mediterranèa, çò publicàvem dimècres passat. De grops faissistas d’Euròpa tota, dirigits pels franceses de Generacion Identitària son a promòure una campanha nomenada “Defendre Euròpa” amb la quala ensajan d’empachar fisicament los salvaments en mar. De costuma se servisson de batèls rapids e de fusadas esclairantas per empedir e boicotar las manòbras dels vaissèls de salvament. An passat de fomentar l’òdi, a empedir que se secorran de personas a mand de se negar dins l’aiga. Valent a dire que son arribats a l’assassinat de las personas migrantas o refugiadas.
 
Dins l’amarum e lo tristum que nos provòca aquela informacion, una autra informacion que publicàvem divendres nos daissava una sabor doça e amara a l’encòp. Cédric Herrou, lo païsan de la Val de Ròia qu’es vengut lo simbòl de l’ajuda als migrants e als refugiats, foguèt detengut en gàrdia a vista entre dimècres e dijòus passats dins la gendarmariá de Brelh de Ròia. Li repròchan una “ajuda a l’entrada, a la circulacion e al sojorn d’estrangièrs en situacion irregulara”. Es pas lo primièr còp que detenon Herrou, que l’an ja jutjat qualques còps per èsser solidari amb las personas umanas que fugisson a la recèrca d’una vida melhora. D’un costat, planhèm que l’administracion e las fòrças de seguretat priorizen cèrtas leis e privilègis economics e socials a las vidas umanas, mas de l’autre, d’accions coma la de Cédric Herrou e la còla de Ròia Ciutadana nos fan encara creire en l’umanitat.
 
E dins aquel sens volèm soslinhar l’eveniment que se debanèt dijòus passat a Tolosa, que nos fa creire totjorn en l’umanitat e tanben en las valors de convivéncia e paratge que presica l’occitanisme. Convergéncia Occitana organizèt, en plen periòde de Ramadan, un rescontre intercultural consagrat a la coexisténcia e l’interconeissença, amb una rompedura collectiva del june dins un repais oriental, e de charradissas sul june per d’especialistas en cristianisme, judaïsme e islam. La tòca de l’eveniment èra de priorizar “la cultura e lo partatge, fàcia a la barbariá” a un moment ont lo dialòg intercultural risca d’èsser copat.
 
Amb aqueste editorial volèm mercejar los volontaris de las organizacions umanitàrias que salvan de vidas en Mediterranèa, la còla de Ròia Ciutadana per nos mostrar la dralha de la solidaritat, e Convergéncia Occitana per cessar pas de bastir dins lo dialòg intercultural e la coneissença dels unes amb los autres. Aqueste es lo camin devèrs una cultura de la patz.
 
Per quant a cèrts comentaris racistas e islamofòbs que qualques legeires escrivon dins Jornalet, volèm profechar d'aquestas linhas per lor mostrar nòstre refús mai energic. Al meteis temps volèm informar nòstres legeires qu’al costat de cada comentari i a un boton dich “comentari inadeqüat”, que se poirà quichar se lo comentari en question se considèra coma ofensant. Los comentaris marcats amb aquela opcion los moderarem al pus lèu possible.