Aran es un país occitan que s’es anat destacant de la rèsta del país dins la mesura que la lenga e la cultura occitanas èran a recular, mai que mai de l’autre costat de la frontièra politica. Mas darrièrament se presentan qualques escasenças de retrobament tre qu’Aran e Comenge foguèsson connectats pel transpòrt public lo mes de junh passat. De mencionar la preséncia d’occitanistas qu’ajudèron a salvar las urnas dins los burèus de vòte d’Aran durant lo referendum del 1r d’octòbre passat.
 
Dins l’encastre cultural i a un eveniment en Aran que voldriam soslinhar, per sa causida culturala, mai que mai per organizar una serada musicala amb de grops de Gasconha e de las Valadas occitanas. S’agís de Era Mongetada, un festenal gastronomic e cultural d’Aran nascut amb la tòca de festejar la recuperacion de la varietat de mongeta de Bossòst,e qu’ongan arriba a sa 6a edicion. L’eveniment prepausa durant dos jorns d’activitats gastronomicas, culturalas e ludicas a Bossòst e Garòs e cresèm qu’es una bona escasença per que los occitans de tot lo país visiten Aran.
 
Dempuèi la naissença de Jornalet avèm tengut una relacion estrecha amb la còla de Era Mongetada. Ongan tanben i anarem e la nòstra implicacion serà mai intensa que jamai: farem lo Jornalet sus plaça, raportarem l’eveniment per Occitània tota e mai enregistrarem de filmets per Betevé, la television de Barcelona. Se volètz venir, nos i trobaretz. Esperam que siá una bona escasença per vos saludar e parlar un pauc.
 
 
 

---

Era Mongetada
Hèsta gastronomica deth grèmi d’ostalaria dera Val d’Aran
Bossòst - Garòs, 28 - 29 d’octòbre 2017
www.eramongetada.org