Coma sabètz ben, la còla dels Amics de Jornalet a començat una campanha de micromecenatge per que se pòsca participar dirèctament al miracle d’aver encara aqueste quotidian occitan, qu’existís dempuèi cinc ans e mièg.
 
Dempuèi lo primièr jorn, disèm que Jornalet es una publicacion en linha gratuita, sens constrencha de pagament ni soscripcion de cap de sòrta. Sèm fòrtament convencuts que la precarietat dels mèdias en occitan e nacionalament centrats sus Occitània es tan granda que o podèm pas complicar mai en fasent venir lo sit pagant. Sèm conscients qu’aqueste fach pòrta tòrt a Jornalet, mas portariá encara mai de tòrt a la comunicacion en occitan e a nòstres legeires. Se cal far de sacrificis, preferissèm de los far nosautres e non que los fagan los legeires.
 
Ça que la, vos volèm encoratjar a participar a aqueste projècte de micromecenatge aviat pels Amics de Jornalet. Tot l’argent que nos arribarà—se se pòt arribar d’amassar mila èuros abans lo 12 de decembre— serà emplegat per desprecarizar la situacion del cap-redactor e per melhorar lo produch, e nos ajudarà a virar pel país e a vesitar los principals eveniments amb la tòca de rendre Jornalet mai participatiu encara, per fin que pòsca venir, de verai, un jornal de totes e per totes los occitans, e tanben per los amics d’Occitània.
 
Naturalament, se cèrca pas cap de don de las personas al caumatge, retiradas, estudiantas o que subisson un marrit moment economic. Mas pensam qu’un apòrt pontual de 10 o 25 o 50 èuros pòt èsser una contribucion fòrça pichona per una persona amb un salari normal o amb una pension generosa. De segur, es una contribucion menora, mas representa una ajuda màger per Jornalet e aquò nos encoratja de veire que nòstres legeires senton qu’aqueste jornal es lor e que velhan de manténer son avenir. De la meteissa faiçon que los legeires ja fan partida de nòstra vida, volèm que sentatz que, sustot, Jornalet fa partida de vòstra vida.
 
L’associacion Los Amics del Jornalet es legala dins la Republica Francesa e es nascuda al marge de Jornalet.  A per tòca de sosténer Jornalet, dins sas possibilitats, al nivèl economic e a l’ora d’ara, es la principala font de finançament d’aqueste jornal.
 
Ça que la, i a quicòm que volèm plan precisar: lo jornal que sètz a legir quitarà pas de paréisser cada jorn amb d’articles nòus e de nòvas opinions e quitarà pas d’èsser d’accès gratuit. O avèm ja escrich d’autres còps: la lenga occitana e l’espaci occitan de comunicacion son tròp fragils, uèi lo jorn, e i podèm pas metre mai d’obstacles. Ont arribarà pas l’argent i metrem mai d’oras panadas a la familha, al sòm e al trabalh. Mas vos mercejarem plan se fasètz un gèst de solidaritat.
 
Mercé plan!