Gaireben totes los movements occitanistas an mostrat lor solidaritat amb lo pòble catalan, après la fòrta repression qu’a patida de l’estat espanhòl a l’ora de voler decidir son avenir: l’enebicion de la celebracion d’un referendum d’independéncia en Catalonha e Aran, la desproporcionada violéncia policièra contra las gents que votavan, l’empresonament dels presidents de las associacions independentistas e dels membres del govèrn de la Generalitat de Catalonha qu’èran pas exiliat a Brussèlas.
 
D’occitanistas coneguts de la societat civila al nivèl individual, e tanben en nom de movements coma l'Assemblada Nacionala Occitana (ANÒC), País Nòstre, Inciativa per Occitània o Libertat, e de figuras conegudas de la politica coma Gérard Onesta, Patric Roux, David Grosclaude, José Bové, en lor nom pròpri o en lo del Partit de la Nacion Occitana, del Partit Occitan e quitament d’Euròpa Ecologia Los Verds, an mostrat lor solidaritat e quitament son anats sus plaça, tant al Principat de Catalonha coma en Val d’Aran per ajudar e per raportar al Mond çò que se passa.
 
Demest los messatges de solidaritat que lo pòble de Catalonha e Aran a recebuts d’Occitània, volèm soslinhar lo comunicat qu'a publicat lo Movement dels Estudiants d’Occitània de Pau e dels Païses d’Ador (Med’Òc) amb la joventut bearnesa e bigordana. S’agís un comunicat que descriu clarament los faches dins lor encastre istoric, explica cossí s’es debanat lo procès independentista e remembra los dreches fondamentals mençonats dins la Carta de las Nacions Unidas e tanben dins lo Tractat de Roma de 1954 en tot demostrar que l’estat espanhòl, sòci de l’ÒNU e de l’Union Europèa, los respècta pas. “De mei, tà nosautes, que sembla dangerós d’aver remplaçat aquera hrèita de comunicacion per ua ofensiva brutau en Catalonha”, çò precisa lo comunicat.
 
Los estudiants bearneses e bigordans se mòstran tanben preocupats per “la dissolucion e la mesa en tutèla de la representacion democratica catalana, de las nombrosas arrestacions e de la criminalizacion juridica de las activitats politicas” e tanben per “las grèvas penas arretiengudas contra lo govèrn catalan”. Mas benlèu es encara pus precocupanta “aquera abséncia d’iniciativa de l’Union Europèa qu’ei ua manca de dever de mediacion dens los conflictes continentaus”. Enfin, lo comunicat dels estudiants de Bearn e Bigòrra sosten “lo president Puigdemont per un retorn a la democracia en Catalonha” e tanben sosten “lo president Talamoni qui demanda «ua unitat de tots los democratas europèus tà ahortir la demanda catalana»”.
 
Per ansin, tanben la redaccion de Jornalet mostram nòstre chepic pel silenci de l’Union Europèa davant una crisi democratica talament grèva, e sustot saludam tota la solidaritat que l’occitanisme a mostrada amb Catalonha e Aran. Se lo pòble catalan reüssís, aquò serà un bonaür per Occitània e mai que mai per la democracia.