Lo procès d’independéncia de Catalonha e Aran avança pauc a cha pauc. Après la gèsta d’aquela cadena umana de 400 quilomètres long de Catalonha en 2013, e las eleccions regionalas de 2015, l’independentisme creis e es arribat de començar la bastison d’una nòva republica, que comença malgrat los trabucs d’una fòrta repression. Lo 21 de decembre passat i aguèt fòrça mai de vòtes independentistas que durant lo referendum reprimit del 1r d’octòbre passat e fòrça mai qu’en 2015. De remarcar qu’aquel aument de vòtes a agut luòc dins de circonstàncias completament desfavorablas, amb de candidats en preson o en exili, amb lo govèrn de la Generalitat usurpat pel govèrn de Madrid, governat per un Partit Popular qu’en Catalonha a obtengut a pena lo 4% dels sufragis.
 
Ara sembla qu’Euròpa càmbia de vejaire e lo govèrn d’Angela Merkel reconeis la victòria de l’independentisme e demanda al govèrn espanhòl que dialògue, del temps que la ministra austriana dels afars estrangièrs mòstra sa simpatia envèrs lo procès catalan. Mas l’estat espanhòl contunha sa politica del revenge, alonga la lista de secutats per rebellion e sedicion e a alargit l’enseguida contra l’èx-deputada occitana de la CUP, Mireia Boya, e sa companha de partit Anna Gabriel, e tanben contra lo president Artur Mas, la secretària generala d’ÈRC, Marta Rovira, la coordinatritz generala del PDECat, Marta Pascal, e la presidenta de l’Associacion de las Municipalitats per l’Independéncia, Neus Lloveras. Segon Mireia Boya, se tracta de venjança “sens cap de dobte”. Avèm ja la primièra persona occitana investigada per rebellion dins aquel afar. Preguem que Boya venga pas lo primièr presonièr politic occitan de l’estat espanhòl.
 
Demest d’autras causas, Boya a reüssit a far que tot lo combat estrambordant per la nòva republica se realize en catalan e occitan e, mai qu’aquò, se realize a la catalana e a l’occitana. En revendicant l’oficialitat de la lenga nòstra, la deputada Mireia Boya a obtengut de portar la revendicacion occitanista a tot aquel procès, que l’a divulgada de biais màger. Al referendum del 1r d’octòbre los bulletins de vòte èran en occitan, e a l’ora d’ara es de mai en mai normal de trobar de drapèls occitans dins las manifestacions, e que se cante los imnes catalan e occitan dins cèrts actes politics.
 
Boya es pas pus deputada al Parlament de Catalonha après lo darrièr vòte del 21 de decembre passat. Per contra, arriba de la lista del president Puigdemont una nòva deputada aranesa que portarà la revendicacion occitana al Parlament: Anna Geli.
 
La còla Jornalet vòl, amb aqueste editorial, mercejar lo trabalh qu’a menat a bon tèrme nòstra compatriòta Mireia Boya e li mostrar tota sa solidaritat, e tanben saludar l’arribada d’Anna Geli al Parlament de Catalonha.