L'afar dels presonièrs politics catalans es a passar l'òsca cada jorn. Luènh de s'apasimar, la repression de l'estat espanhòl contra los elegits que simplament complisson lors engatjaments politics es a créisser de mai en mai. A l’ora d’ara, son en preson los dos presidents de las associacions independentistas, Jordi Cuixart e Jordi Sànchez; lo vicepresident de la Generalitat de Catalonha, Oriol Junqueras, e lo conselhièr de l’Interior, Joaquim Forn. En mai d'aquò, i a tant d'autres elegits en exili, dont lo quite president legitim de la Generalitat de Catalonha, Carles Puigdemont, e d'autres meses en libertat jos caucion, dont l'èx-presidenta del Parlament de Catalonha, Carme Forcadell. Ara la lista dels represalhats s’alonga, e pel primièr còp tòca una ciutadana occitana: l'èx-deputada aranesa Mireia Boya.
 
Quand intrèt coma deputada al Parlament de Catalonha, Mireia Boya, s'engatgèt per l’independéncia, lo drech de decidir d’Aran, la politica sociala e la nacion occitana. Es a dire qu’al programa electoral de la CUP, que compliguèt escrupulosament, Boya apondèt la revendicacion occitanista. Gaireben tot l'occitanisme èra estrambordat amb son eleccion, e ela nos raportava son activitat al Parlament.
 
Nos a pas decebuts. Demest d’autras causas, Boya a reüssit a far que tot lo combat estrambordant per la nòva republica se realize en catalan e occitan e, mai qu’aquò, se realize a la catalana e a l’occitana. En revendicant l’oficialitat de la lenga nòstra, l'èx-deputada occitana a obtengut de portar la revendicacion occitanista a tot aquel procès, que l’a divulgada de biais màger. Al referendum del 1r d’octòbre los bulletins de vòte èran en occitan, e a l’ora d’ara es de mai en mai normal de trobar de drapèls occitans dins las manifestacions, e que se cante los imnes catalan e occitan dins cèrts actes politics.
 
Ara, fòra son activitat parlamentària, nòstra Mireia es luènh de se sometre a la paur de la repression, coma sembla que se passa en çò de qualques elegits (que n'an drech). Al contrari, ela contunha de menar una activitat politica e sociala en Catalonha e tanben en Occitània, ont parla totjorn net e clar, en occitan e en quina lenga adeqüata que siá. La vegèrem a Narbona, a Montpelhièr, a Baiona... ara la veirem davant un jutge que l'acusa de rebellion per aver complits sos engatjaments electorals.
 
La còla de Jornalet vòl mostrar tot son sosten a Mireia Boya e la mercejar pel trabalh efectuat. En mai d'aquò, volèm estendre nòstra solidaritat amb totes los presonièrs politics e los enseguits en justícia per aver complit lo mandat del pòble, e amb totes los que se baton e se son batuts per la libertat e la democracia.