Jos l’eslogan “Un papà, una mamà, se mentís pas als enfants”, l’associacion antiabortista Alliance Vita, fondada per l’èx-ministra conservadora Christine Boutin, amassèt qualques 300 personas a Tolosa e Marselha, e un pauc mens dins d’autras vilas del país. La tòca, çò dison, èra de “tornar metre los enfants al centre del debat”.
 
Perqué pas dos paires o doas maires? Son melhoras las familhas monoparentalas? Son melhors los enfants dins un orfanat? Benlèu aquela exigéncia que los enfants ajan un paire e una maire es pr’amor de la disparitat dels ròtles e dels dreches dels òmes e de las femnas.
 
Lo govèrn francés va retardar l’adopcion del projècte de lei de matrimòni egalitari, probablament influit per aquela ofensiva ultraconservadora. E mai se lo drech de se maridar e d’adoptar pels parelhs del meteis sèxe es una promessa electorala de François Hollande que la pòt far aprovar, el, pr’amor qu’a la majoritat dins l’Assemblada Nacionala e lo Senat.
 
Ça que la, l’imatge de la jornada de las manifestacions d’Alliance Vita prenguèt un caire plan desparièr. Doas gojatas eterosexualas de 17 e 19 ans, Júlia e Auriana (“Julia” e “Auriane”), que se coneissián quitament pas, captèron lo resson mediatic amb lor iniciativa de se far un poton davant los manifestants a Marselha.
 
Las gojatas expliquèron a la revista Têtu lor decision espontanèa e lors sensacions. Mentre que se potonejavan “pendent quinze segondas”, los manifestants lor cridavan “Sètz fastigosas!”
 
Auriana e Júlia o vesián fòrça clar de far aquela accion: “cal pas èsser omosexual per los apiejar. Es un pur e simple gèst de solidaritat. Soi en favor de çò qu’aqueles manifestants vòlon pas”, çò diguèt Júlia.
 
Dins lo país de la convivéncia, del paratge e de l’amor, Júlia e Auriana an combatut amb succès l’intolerància de la faiçon mai occitana: tot simplament amb un poton.