A l'ora de crompar la noiridura, nòstra causida pòt profechar a un biais de produccion e a un modèl economic mai o mens just. Lo consumaire es de mai en mai assabentat de l'origina dels produches. Quand causissèm d'aquerir de produches de proximitat, favorissèm l'economia locala e poiriam quitament crear de sinergias entre los productors e los consumaires, coma se passa dins certans endreches qu'organizan de cooperativas de consume. Comprar de produches del terraire e de la sason es, per nosautres, lo biais pus rasonable de viure al país.
 
Mas se cal pas far enganar. La majoritat dels magazins d'alimentacion de l'estat francés fan de promocion per que crompem d’aliment produches en França. Mas atencion! Es mai ecologic per un bearnés de crompar un caulet produch en Picardia qu'en Aragon? E en Aran, un vin de Sautèrnas, Bordèu o Jurançon se deu vendre coma se foguèsse d'importacion del temps que los vins catalans e espanhòls son considerats locals?
 
Aquesta setmana, legissiam dins Jornalet una autra d'aquelas contradiccions. A partir de 2022, en França se poirà solament crompar los uòus faches per de galinas que vivon en plen aire. Mas aquela mesura concernirà pas la produccion d'uòus per d'usatges industrials, qu'es l'immensa majoritat dels uòus produches.
 
Es pecat que la conscientizacion de mai en mai generala devèrs una produccion responsabla, ecologica, justa e duradissa siá estada pervertida per las leis del marqueting ultracapitalista.
 
Mentretant, nos cal èsser totjorn atentius a l'ora de far las crompas e prene en compte qualques aspèctes importants de çò que crompam, coma son impacte environamental, la proximitat de la produccion, saber quinas societats respèctan l'environament e pagan de salaris justes, e preferir totjorn de produches amb d'embalatges tornables o reütilizables. Mas sustot, cal privilegiar los mercats e las botigas dels quartièrs, e non pas los grands centres comercials.