Son ja passats sièis ans dempuèi que nasquèt Jornalet. Sèm pas las personas mai apropriadas per o dire, mas avèm la percepcion que per fòrça occitans, legir aqueste quotidian es una abitud de cada jorn o de cada setmana. Aquò es justament la tòca que tot mèdia cèrca e podèm doncas afirmar qu’avèm atengut una partida importanta de nòstra tòca. Volèm, doncas, grandmercejar los legeires, los collaboradors, los redactors, los opinants, la còla del conselh lingüistic, lo corrector, los opinants e los amics que nos ajudan a far avançar aqueste projècte. E, solide, los anonciaires que nos ajudan a finançar e las institucions que nos donan tanben un còp de man. Res de tot aquò seriá pas possible se manquèsse un d’aqueles elements qu’avèm mençonats.
 
Son passats sièis ans, doncas, e non demòra que l’opcion de contunhar. O farem pas solets. Son nascuts mai de mèdias en occitan e los que ja i èran son de mai en mai fòrts. L’espaci occitan de comunicacion, indispensable se volèm superar l’alienacion e bastir una mentalitat collectiva occitana, es mai fòrt uèi que fa sièis ans. E esperam que serà encara pus fòrt dins las annadas avenidoiras. Per o far possible cal contunhar de trabalhar coma fins ara: amb insisténcia, sens donar cap de batalha per perduda e amb la flexibilitat necita per que l’occitanisme venga un movement unit e integrator. Nosautres i serem. Cada jorn.
 
 
Estatisticas
 
Coma totjorn, podèm ofrir qualques donadas sul jornal. Pendent aqueles sièis ans son passats per las paginas de Jornalet mai d'un milion e mièg de vesitaires qu'an dobèrt gaireben quatre milions de paginas. Dins la darrièra annada son arribats a las paginas de Jornalet mai de 75 000  legeires nòus en mantenent la mejana del milièr de legeires per jorn. Aquò es pas marrit per un mèdia en lenga minorizada!
 
Avèm de legeires per tot lo Mond, mas la granda majoritat son de legeires que vivon en Occitània. E mai Barcelona siá la primièra vila en nombre de legeires, aquesta es seguida de París, Tolosa, la Val d'Aran, Montpelhièr, Girona, Engoleime, Valéncia, Bordèu, Colomèrs e Niça.
 
Per estats, França es lo que pòrta mai de legeires a Jornalet, un 49%, seguida d'Espanha amb un 37%. Itàlia nos pòrta a pena l'1,43% dels legeires, çò que nos fa veire que nos deuriam sarrar mai de las Valadas e de la Gàrdia. Cal dire que sèm estats legits dins totes los païses del Mond manca Surinam, Papoa Nòva Guinèa, Birmania, Turcmenistan, Osbequistan, Tatgiquistan, Quirguizstan e una dotzena d'estats africans.
 
Una donada fòrça considerabla: tres personas sus quatre que vesitan lo sit de Jornalet i tornan dins lo futur. Es un naut gra de fidelizacion que nos rend plan gaujoses.
 
 
Los amics de Jornalet
 
Es un miracle que sens cap de finançament siam venguts fins aquí. Ongan, fin finala, nos es arribada una ajuda pas brica mespresabla de la Generalitat de Catalonha, mentre que de l'ÒPLO sèm totjorn a ne parlar sens aver pas res concretizat.
 
De mercejar lo Conselh General d'Aran e Convergéncia Occitana que tre lo primièr an an sostengut aqueste jornal.
 
Totun, çò que fa venir vertadièrament possible aqueste jornal son las contribucions individualas, los dons que nos pervenon per PayPal, e los sòcis de l'ADÒC (associacion de drech catalan) e l'associacion Los Amics de Jornalet (associacion de drech francés). Se vos i sètz pas encara marcats, o podètz far aicí: jornalet.com/socis
 
 
De comentaris guierdonats
 
Ongan voldriam mercejar modèstament los comentaris de nòstres legeires. Avèm quatre bandièras occitanas amb la crotz e l'estela e tanben quatre camisetas ofèrtas per Macarèl que voldriam mandar a nòstres legeires. Daissatz-nos de comentaris amb vòstre vejaire sus Jornalet, d'opinions, d'idèas, de criticas, e tot çò que nos pòsca servir per far un jornal melhor. Los comentaris mai valorizats recebràn aqueles presents.